ലങ്ക പിടിക്കാന്‍ ധോണിയും കുട്ടികളും ഇന്നിറങ്ങും; ജയിച്ചാല്‍ പലതുണ്ട് കാര്യം

ഇന്ത്യ- ശ്രീലങ്ക ട്വന്റി-20 ക്രിക്കറ്റ് പരമ്പരയ്‌ക്ക് ഇന്ന് തുടക്കമാകും. മൂന്നു മത്സരങ്ങളുടെ പരമ്പരയാണ് ലങ്കയുമായുള്ളത്. പരമ്പരയിലെ ആദ്യ മത്സരം ഇന്ന് പൂനെയിലെ മഹാരാഷ്ട്ര ക്രിക്കറ്റ് അസോസിയേഷൻ ഗ്രൗണ്ടിൽ നടക്കും. രാത്രി 7.30മുതലാണ് മത്സരം.

പരമ്പരയിലെ വിജയികള്‍ക്ക് ഒന്നാം റാങ്ക് എന്ന ലക്ഷ്യവുമുണ്ട്. പരമ്പരയില്‍ ഇന്ത്യ 3-0ന് ജയിക്കുകയാണെങ്കില്‍ ഒന്നാം സ്ഥാനം നിലനിര്‍ത്തും. ഓസ്ട്രേലിയക്കെതിരേ സമ്പൂര്‍ണ ജയം നേടിയാണ് ടീം ഇന്ത്യ ഒന്നാം സ്ഥാനത്തേക്കു കുതിച്ചെത്തിയത്.

ഓസ്ട്രേലിയയെ അവരുടെ നാട്ടില്‍ തകര്‍ത്ത് മൂന്നു മത്സരരങ്ങളുടെ ട്വന്റി-20 പരമ്പര 3-0ന് തൂത്തുവരിയ ആത്മവിശ്വാസത്തിലാണ് മഹേന്ദ്രസിംഗ് ധോണിയുടെ നേതൃത്വത്തിലുള്ള ടീം ഇന്ത്യ പുതിയ ശ്രീലങ്കയെ നേരിടാനിറങ്ങുന്നത്. അടുത്തമാസം ട്വന്റി-20 ലോകകപ്പ് മത്സരങ്ങളും ഈ മാസം ഏഷ്യാകപ്പ് മത്സരങ്ങളും ആരംഭിക്കാനിരിക്കെ ലങ്കയുമായുള്ള പരമ്പര ധോണിക്കും സംഘത്തിനും നിര്‍ണായകമാണ്.