ചാമ്പ്യന്സ് ട്രോഫി മത്സരത്തില്‍ പാകിസ്ഥാനെതിരെ കളിക്കുന്നതിനെക്കുറിച്ച് മധ്യമപ്രവര്‍ത്തകന്‍ ചോദിച്ച ചോദ്യം ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്‌ലിയെ പ്രകോപിതനാക്കി.
ഇന്ത്യ- പാക് ബന്ധം വഷളായിരിക്കുന്ന സാഹചര്യത്തില്‍ അവര്‍ക്കെതിരെ കളിക്കുന്നതിനെക്കുറിച്ച് നിങ്ങള്‍ എന്തു ചിന്തിക്കുന്നുവെന്നായിരുന്നു കോഹ്‌ലിയോട് ഒരു മാധ്യമപ്രവര്‍ത്തകന്‍ ചോദിച്ചത്. ഇതാണ് ക്യാപ്‌റ്റനെ ദേഷ്യം കൊള്ളിച്ചത്.
“ പാകിസ്ഥാനെതിരായ മത്സരം കളിക്കാരായ ഞങ്ങളെ സംന്ധിച്ച മറ്റൊരു ക്രിക്കറ്റ് മല്‍സരം മാത്രമാണ്. പക്ഷേ, നിങ്ങള്‍ ഇവിടെ വന്നിരിക്കുന്നത് നിങ്ങളുടേതായ ചില ധാരണകളും വെച്ചുകൊണ്ടാണ്. ബാറ്റ് ചെയ്യുമ്പോള്‍ മറുവശത്തു നില്‍ക്കുന്ന സഹതാരത്തെക്കുറിച്ച് പോലും ചിന്തിക്കാറില്ല. ഇരു രാജ്യങ്ങളും തമ്മിലുള്ള മത്സരം എന്നും ആവേശമുളവാക്കുന്നതാണ് ” - എന്നു കോഹ്‌ലി വ്യക്തമാക്കി.
ചാമ്പ്യന്സ് ട്രോഫിക്കായി ലണ്ടനിലേക്ക് യാത്രതിരിക്കും മുമ്പ് നടത്തിയ വാര്‍ത്താസമ്മേളനത്തിലാണ് കോഹ്‌ലി ഇക്കാര്യം വ്യക്തമാക്കിയത്. ജൂണ്‍ നാലിന് എഡ്ജ്ബാസ്റ്റണില്‍ പാകിസ്ഥാനെതിരെയാണ് ഇന്ത്യയുടെ ആദ്യ മത്സരം.
