പാകിസ്ഥാന്‍ ടീമിലെ മുന്‍ സഹതാരമായ അഹമ്മദ് ഷെഹ്‌സാദിനെതിരെ നിയമനടപടിക്കൊരുങ്ങി പാകിസ്ഥാന്‍ ടീം നായകന്‍ ബാബര്‍ അസം. ടി20 ലോകകപ്പില്‍ അമേരിക്കക്കെതിരെ പരാജയപ്പെട്ട് ഗ്രൂപ്പ് ഘട്ടത്തില്‍ തന്നെ പാകിസ്ഥാന്‍ മടങ്ങിയതോടെ വലിയ വിമര്‍ശനങ്ങളാണ് ഷെഹ്സാദ് മാധ്യമങ്ങളിലൂടെ നടത്തിയത്. ഷെഹ്‌സാദിനൊപ്പം ചില യൂട്യൂബ് ചാനലുകള്‍ക്കെതിരെയും ബാബര്‍ നിയമനടപടികളുമായി മുന്നോട്ടുപോകുമെന്നാണ് റിപ്പോര്‍ട്ടുകള്‍.
ടി20 ലോകകപ്പിലെ ഗ്രൂപ്പ് ഘട്ടത്തില്‍ അമേരിക്കക്കെതിരെ ആദ്യ ഗ്രൂപ്പ് മത്സരത്തില്‍ തന്നെ പരാജയപ്പെട്ടതോടെയാണ് പാക് ടീമിനെതിരെയും നായകന്‍ ബാബര്‍ അസമിനെതിരെയും കടുത്ത രീതിയില്‍ വിമര്‍ശനമുയര്‍ന്നിരുന്നത്. ഷെഹ്‌സാദിനൊപ്പം പല മുന്‍ പാക് താരങ്ങളും പാക് ടീമിനെതിരെ രൂക്ഷവിമര്‍ശനമാണ് നടത്തിയിരുന്നത്. ആഭ്യന്തര,രാജ്യാന്തര മത്സരങ്ങളില്‍ ബാബര്‍ അസമിനൊപ്പം കളിച്ച താരമാണ് അഹമ്മദ് ഷെഹ്സാദ്. മോശം പ്രകടനങ്ങളുടെ പേരിലാണ് താരം പാക് ടീമില്‍ നിന്നും പുറത്തായത്.
