ദക്ഷിണാഫ്രിക്കന്‍ ടീമിന്റെ കരുത്തും റോയല്‍ ചലഞ്ചേഴ്‌സിന്റെ വെടിക്കെട്ട് താരവുമായ എബി ഡിവില്ലിയേഴ്‌സിനെ പ്രശംസിച്ച് ഇന്ത്യന്‍ ഉപനായകന്‍ വിരാട് കോഹ്ലി. ഏത് സമ്മര്‍ദ്ദഘട്ടത്തെയും തരിപ്പണമാക്കുന്ന എബി ഈ തലമുറയിലെ ഏറ്റവും മികച്ച ബാറ്റ്‌സ്മാനാണ്. അദ്ദേഹത്തിന്റെ മികവാണ് ഈ വിശേഷണത്തിന് കാരണമായതെന്നും കോഹ്ലി പറഞ്ഞു.
ക്രീസിലെത്തിയാല്‍ ഏത് പന്തുകളെയും അതിര്‍ത്തി കടത്താന്‍ കഴിവുള്ള അടിപൊളി ബാറ്റ്‌സ്‌മാനാണെന്ന് ഡിവില്ലിയേഴ്‌സ്. സമ്മര്‍ദ്ദങ്ങള്‍ അതിവേഗം അതിജീവിച്ച് തകര്‍പ്പന്‍ പ്രകടനം നടത്തുന്നതിനുള്ള അദ്ദേഹത്തിന്റെ കഴിവ് മികച്ചതാണ്. അദ്ദേഹത്തിനൊപ്പം വന്‍ കൂട്ടുക്കെട്ടുകള്‍ പടുത്തുയര്‍ത്താന്‍ നേരത്തെയും കഴിഞ്ഞിട്ടുണ്ട്. ഇതിനാലാണ് ഡിവില്ലിയേഴ്‌സ് ഈ കാലഘട്ടത്തിലെ ഏറ്റവും മികച്ച ബാറ്റ്സ്മാന് ആകുന്നതെന്ന് കോഹ്ലി പറഞ്ഞു.
ഐപിഎല്ലില്‍ സണ്‍റൈസറിനെതിരെ 14.3 ഓവറില്‍ 157 റണ്‍സിന്റെ തകര്‍പ്പന്‍ കൂട്ടുകെട്ട് ഉയര്‍ത്തിയതിന് ശേഷമാണ് എബിഡിയെ തലമുറയിലെ ഏറ്റവും മികച്ച താരമെന്ന് കോഹ്ലി വിശേഷിപ്പിച്ചത്. നേരത്തെയും ഇരുവരും വന്‍ സ്‌കോറുകള്‍ കണ്ടെത്തുകയും ചെയ്‌തിരുന്നു.