വാക്‌സിന്‍ സ്വീകരിച്ചാലും ഡെല്‍റ്റ വകഭേദത്തോടുള്ള പ്രതിരോധശേഷി കുറവാണെന്ന് പഠനം. അസ്ട്രസെനക, ഫൈസര്‍ വാക്‌സിന്‍ രണ്ട് ഡോസും എടുത്ത് 90 ദിവസം കഴിയുന്നവരില്‍ കോവിഡ് ഡെല്‍റ്റ വകഭേദത്തോടുള്ള പ്രതിരോധശേഷി കാര്യമായി കുറയുന്നുവെന്നാണ് ഓക്‌സ്ഫഡ് സര്‍വകലാശാല നടത്തിയ പഠനത്തില്‍ പറയുന്നത്. ഫൈസറിന് 75 ശതമാനവും ഇന്ത്യയില്‍ കോവിഷീല്‍ഡ് എന്ന് അറിയപ്പെടുന്ന അസ്ട്ര സെനകയ്ക്ക് 61 ശതമാനവും മാത്രമാണ് ഡെല്‍റ്റ വകഭേദത്തെ പ്രതിരോധിക്കാനാവുക. വാക്‌സിന്‍ സ്വീകരിച്ച ശേഷം കോവിഡ് വരുന്നവരില്‍ നിന്ന് രോഗം മറ്റുള്ളവരിലേക്ക് പകരാന്‍ സാധ്യത കൂടുതലാണെന്നും ഈ പഠനത്തില്‍ പറയുന്നു. ഇവരിലെ വൈറസ് സാന്നിധ്യവും വാക്‌സിന്‍ എടുക്കാത്തവരുടേതിന് തുല്യമാണ്. ഇരുപത്തഞ്ച് ലക്ഷത്തിലേറെപ്പേരുടെ പരിശോധനാഫലം കണക്കിലെടുത്താണ് ഓക്‌സ്ഫഡ് സര്‍വകലാശാലയുടെ പഠനം.