കണ്ണുകള്‍ ലോകത്തെ കാണാന്‍ നിങ്ങളെ സഹായിക്കുക മാത്രമല്ല ചെയ്യുന്നത്; അവയ്ക്ക് മറഞ്ഞിരിക്കുന്ന പല ആരോഗ്യ പ്രശ്‌നങ്ങളെയും പ്രതിഫലിപ്പിക്കാന്‍ കഴിയും. പ്രത്യേകിച്ച് നിങ്ങളുടെ വൃക്കകളുമായി ബന്ധപ്പെട്ട തകരാറുകള്‍. ശരീരത്തില്‍ നിന്ന് വിഷവസ്തുക്കളെ നീക്കം ചെയ്യുന്നതില്‍ വൃക്കകള്‍ ഒരു പ്രധാന പങ്ക് വഹിക്കുന്നു. എന്നാല്‍ അവ തകരാറിലാകുമ്പോള്‍ നിങ്ങളുടെ കണ്ണുകളിലും ലക്ഷണങ്ങള്‍ കാണിക്കാറുണ്ട്. അവയെന്തൊക്കെയാണെന്ന് നോക്കാം.
വീര്‍ത്ത കണ്ണുകളോടെ ഉണരുന്നത് സാധാരണമാണ്, എന്നാല്‍ രാത്രിയിലെ നല്ല ഉറക്കത്തിനു ശേഷവും വീക്കം അങ്ങനെ തന്നെ തുടരുകയാണെങ്കില്‍, അത് മൂത്രത്തിലൂടെ പ്രോട്ടീന്‍ നഷ്ടപ്പെടുന്നതിന്റെ ലക്ഷണമാകാം. അതായത് നിങ്ങളുടെ വൃക്ക തകരാറിന്റെ ലക്ഷണമായിരിക്കാം ഇത്. ഇതിനെ പ്രോട്ടീനൂറിയ എന്നറിയപ്പെടുന്നു, ഇത് ഗൗരവമായി കാണണ്ടേ ഒരവസ്ഥയാണ്. കൂടാതെ പെട്ടെന്ന് കാഴ്ച മങ്ങുകയാണെങ്കില്‍, അത് വൃക്കകളുടെ പ്രശ്‌നമാകാം.
വൃക്ക സംബന്ധമായ പ്രശ്‌നങ്ങളുമായി ബന്ധപ്പെട്ട ഉയര്‍ന്ന രക്തസമ്മര്‍ദ്ദവും പ്രമേഹവും കണ്ണുകളിലെ ചെറിയ രക്തക്കുഴലുകളെ ബാധിക്കുകയും അത് കാഴ്ചയില്‍ മാറ്റങ്ങള്‍ വരുത്തുകയോ പെട്ടെന്ന് കാഴ്ച നഷ്ടപ്പെടുകയോ ചെയ്യും. ഇവകൂടാതെ വരണ്ടതും ചൊറിച്ചിലുള്ളതുമായ കണ്ണുകള്‍, കണ്ണുകളിലെ ചുവപ്പ്, നിറങ്ങള്‍ കാണാനുള്ള ബുദ്ധിമുട്ട് എന്നിവയും വൃക്കയുടെ തകരാറുമായി ബന്ധപ്പെട്ടതാകാം.
