ദിലീപ് റഷ്യയിലേക്ക് പറക്കുന്നു. വെല്‍കം ടു സെന്‍‌ട്രല്‍ ജയില്‍ എന്ന സിനിമയുടെ ഭാഗമായാണ് ദിലീപിന്‍റെ റഷ്യന്‍ യാത്ര. പ്രധാനമായും ഗാനരംഗങ്ങളാണ് റഷ്യയില്‍ ചിത്രീകരിക്കുക.
സുന്ദര്‍ദാസ് സംവിധാനം ചെയ്യുന്ന ഈ സിനിമയില്‍ സെന്‍‌ട്രല്‍ ജയിലുമായി ബന്ധപ്പെട്ട രംഗങ്ങള്‍ പൂര്‍ത്തിയായിക്കഴിഞ്ഞു. ഇനി ഗാനരംഗങ്ങളും മറ്റ് ചില പ്രധാന രംഗങ്ങളുമാണ് ബാക്കിയുള്ളത്.
ദിലീപ് ഒരു ജയില്‍‌പുള്ളിയായി അഭിനയിക്കുന്ന സിനിമയില്‍ നായിക വേദികയാണ്. ജയിംസ് ആന്‍റ് ആലീസിന് ശേഷം വേദിക നായികയാകുന്ന മലയാള ചിത്രമാണിത്. ബെന്നി പി നായരമ്പലമാണ് വെല്‍കം ടു സെന്‍‌ട്രല്‍ ജയിലിന്‍റെ തിരക്കഥാകൃത്ത്.