ഇന്ത്യന്‍ സിനിമയില്‍ ഇന്ന് ഏറ്റവുമധികം വിപണിമൂല്യമുള്ള സംവിധായകനാണ് എസ് എസ് രാജമൗലി. ബാഹുബലി1,2 സിനിമകള്‍ക്ക് ശേഷം സംവിധാനം ചെയ്ത ആര്‍ആര്‍ആറും വമ്പന്‍ ഹിറ്റായതോടെ രാജമൗലി സിനിമകള്‍ക്കായുള്ള കാത്തിരിപ്പിലാണ് ഇന്ത്യന്‍ ആരാധകര്‍. ഇന്ത്യ കടന്ന് പുറത്തും വമ്പന്‍ വിജയമായ ആര്‍ആര്‍ആര്‍ ഓസ്‌കര്‍ വേദിയിലടക്കം തിളങ്ങിയിരുന്നു. ആര്‍ആര്‍ആറിന് ശേഷം രാജമൗലി ഒരുക്കുന്ന സിനിമയില്‍ തെലുങ്ക് സൂപ്പര്‍ താരമായ മഹേഷ് ബാബുവാണ് നായകനാകുന്നത്. ഇപ്പോഴിതാ ഈ സിനിമയിലേക്ക് വില്ലനായി മലയാളി താരം പൃഥ്വിരാജിനെ പരിഗണിക്കുന്നതായാണ് റിപ്പോര്‍ട്ടുകള്‍ സൂചിപ്പിക്കുന്നത്.
