Mammootty: മലയാള സിനിമയുടെ വല്ല്യേട്ടനാണ് മമ്മൂട്ടി. സിനിമയില്‍ എത്തിയിട്ട് അരനൂറ്റാണ്ട് പിന്നിട്ടെങ്കിലും താരത്തിന്റെ പഴയകാല വിശേഷങ്ങള്‍ അറിയാന്‍ മലയാളികള്‍ക്ക് ഇപ്പോഴും കൗതുകമാണ്. മമ്മൂട്ടിയുടെ കോളേജ് പഠനകാലത്തെ ചിത്രങ്ങളും വിശേഷങ്ങളും ഇടയ്ക്കിടെ സോഷ്യല്‍ മീഡിയയില്‍ വൈറലാകാറുണ്ട്. ഇപ്പോള്‍ ഇതാ മമ്മൂട്ടിയുടെ ചെറുപ്പത്തിലെ ഒരു ചിത്രമാണ് ആരാധകര്‍ക്കിടയില്‍ ചര്‍ച്ചയായിരിക്കുന്നത്.
1985 ല്‍ പ്രസിദ്ധീകരിച്ച ചലച്ചിത്ര മാഗസിനില്‍ ആണ് ഈ ചിത്രം നല്‍കിയിരിക്കുന്നത്. അന്ന് മമ്മൂട്ടി സൂപ്പര്‍താരത്തിലേക്ക് വളരുന്ന സമയം കൂടിയാണ്. വര്‍ഷങ്ങള്‍ക്കു മുന്‍പ് ചലച്ചിത്ര മാഗസിനില്‍ വന്ന ഈ ചിത്രം ഇപ്പോള്‍ പുറത്തുകൊണ്ടുവന്നിരിക്കുന്നത് മലയാളം മൂവി & മ്യൂസിക് ഡാറ്റാബേസ് എന്ന ഫെയ്‌സ്ബുക്ക് പേജാണ്.
Mammootty Childhood Photo
'മമ്മൂട്ടി ഒരു പഴയ കുടുംബചിത്രത്തില്‍' എന്ന ക്യാപ്ഷനോടെയാണ് മാഗസിനില്‍ ഈ ചിത്രം നല്‍കിയിരിക്കുന്നത്. മമ്മൂട്ടിയുടെ പിതാവിന്റെ സഹോദരന്‍, ഭാര്യ മറ്റു കുടുംബാംഗങ്ങള്‍ എന്നിവരെ ചിത്രത്തില്‍ കാണാം. പിന്‍നിരയില്‍ നടുക്ക് നില്‍ക്കുന്നതാണ് മമ്മൂട്ടി. വളരെ ഗൗരവഭാവത്തിലാണ് 'കുട്ടി മമ്മൂട്ടി' നില്‍ക്കുന്നത്. 'അന്നും വീട്ടിലെ വല്ല്യേട്ടന്‍ തന്നെയായിരുന്നല്ലോ മമ്മൂട്ടി' എന്നാണ് ചിത്രത്തിനു താഴെ ആരാധകരുടെ കമന്റ്.