മലയാളികൾക്ക് എന്നും പ്രിയങ്കരിയായ നടിയാണ് ജ്യോതിർമയി. 2001ൽ റിലീസായ പൈലറ്റ്സ് എന്ന സിനിമയിലൂടെയായിരുന്നു നടിയുടെ സിനിമാ അരങ്ങേറ്റം. മീശമാധവനിലെ ജ്യോതിർമയിയുടെ കഥാപാത്രം ശ്രദ്ധേയമായി. പിന്നീട് നിരവധി സിനിമകൾ ലഭിച്ചു. ഇതിനിടെ ആദ്യ വിവാഹം. അത് ഡിവോഴ്സ് ആയി. ശേഷം വീണ്ടും സിനിമയിൽ. അതിനുശേഷമാണ് സംവിധായകൻ അമൽ നീരദുമായി പ്രണയത്തട്ടിലാകുന്നതും വിവാഹിതരാകുന്നതും. വർഷങ്ങൾക്ക് ശേഷം സിനിമയിലേക്ക് തിരിച്ചുവരവ് നടത്തിയിരിക്കുകയാണ് ജ്യോതിർമയി.
പ്രണയിച്ചാണ് വിവാഹം കഴിച്ചതെങ്കിലും ഇവരുടെ പ്രണയ വിശേഷങ്ങളൊന്നും ഇതുവരെ ആർക്കും അറിയില്ലായിരുന്നു. ഇപ്പോഴിതാ റെഡ് എഫ്എം മലയാളത്തിന് നൽകിയ ഏറ്റവും പുതിയ അഭിമുഖത്തിൽ ഭർത്താവിനെ കുറിച്ചും മകനെ കുറിച്ചും നടി പങ്കിട്ട വിശേഷങ്ങളാണ് ചർച്ചയാകുന്നത്. അമൽ നീരദ് എങ്ങനെയാണ് ജ്യോതിർമയിയെ പ്രപ്പോസ് ചെയ്‌തതെന്ന ചോദ്യത്തിനായിരുന്നു നടിയുടെ മറുപടി.
'ഞാനും അമലും സുഹൃത്തുക്കളായിരുന്നു. കോളജ് കാലം തൊട്ട് അമലിനെ പരിചയമുണ്ട്. ഞങ്ങളൊരുമിച്ച് ഒരു ആഡ് ചെയ്തിട്ടുണ്ട്. അത് ഹിറ്റായില്ല. പിന്നെ ഞങ്ങൾ തമ്മിലുള്ള സൗഹൃദം വളർന്നു. ശേഷം വീണ്ടും ഞങ്ങൾ രണ്ടുപേരും രണ്ടുപേരുടെയും വഴിക്ക് പോയി. പിന്നെ എങ്ങനെയോ അത് സംഭവിക്കുകായിരുന്നു. എങ്ങനെയാണെന്ന് ചോദിച്ചാൽ എനിക്കും അറിയില്ല. പിന്നെ ഒരു കൃത്യമായ പ്രപ്പോസൽ ഒന്നും നടത്തിയിട്ടില്ല. എല്ലായിടത്തും കാണുന്നത് പോലൊരു പ്രപ്പോസിങ് അമൽ ഒരിക്കലും ചെയ്യില്ല. അങ്ങനെ ചെയ്തിരുന്നുവെങ്കിൽ ഞാൻ അപ്പോൾ തന്നെ നോ പറഞ്ഞേനെ', ജ്യോതിർമയി വെളിപ്പെടുത്തി.
