നടന്‍ ജയം രവിയും ആര്‍തിയും വിവാഹമോചിതരായി. നടന്‍ തന്നെയാണ് ഇക്കാര്യം തന്റെ ഔദ്യോഗിക ട്വിറ്റര്‍ ഹാന്‍ഡിലിലൂടെ വിവാഹമോചന വാര്‍ത്ത ആരാധകരെ അറിയിച്ചത്. 15 വര്‍ഷം നീണ്ട ദാമ്പത്യജീവിതത്തിനാണ് ഇതോടെ വിരാമമായത്. 2009ലായിരുന്നു ആര്‍തിയും ജയം രവിയും തമ്മില്‍ വിവാഹിതരായത്. ദമ്പതികള്‍ക്ക് ആരവ്,അയാന്‍ എന്നിങ്ങനെ 2 ആണ്മക്കളാണുള്ളത്.
ഒരുപാട് ചിന്തകള്‍ക്കും ആലോചനകള്‍ക്കും ചര്‍ച്ചകള്‍ക്കും ശേഷമാണ് ആരതിയുമായി വേര്‍പിരിയുക എന്ന ബുദ്ധിമുട്ടേറിയ തീരുമാനത്തിലെത്തിയതെന്നും പെട്ടെന്നുണ്ടായ തീരുമാനമല്ല ഇതെന്നും വ്യക്തിപരമായ കാരണങ്ങള്‍ കൊണ്ടും എല്ലാവരുടെയും നല്ലതിനും വേണ്ടിയാണ് തീരുമാനമെന്നും ജയം രവി പറയുന്നു.
ബുദ്ധിമുട്ടേറിയ സമയത്ത് ഞങ്ങളുടെയും കുടുംബാംഗങ്ങളുടെയും സ്വകാര്യത മാനിക്കണമെന്ന് വിനീതമായി അഭ്യര്‍ഥിക്കുന്നുവെന്നും ഇതുമായി ബന്ധപ്പെട്ട് അഭ്യൂഹങ്ങളും അനുമാനങ്ങളും ആരോപണങ്ങളും പ്രചരിപ്പിക്കരുതെന്നും തങ്ങളുടെ സ്വകാര്യത മാനിക്കണമെന്നും ജയം രവി അഭ്യര്‍ഥിച്ചു. പ്രേക്ഷകര്‍ക്ക് താന്‍ തുടര്‍ന്നും അവരുടെ പ്രിയപ്പെട്ട ജയം രവിയായി തുടരുമെന്നും ജയം രവി പറഞ്ഞു.
ജയം രവിയും ആര്‍തിയും തമ്മില്‍ വേര്‍പിരിയുന്നതായി കഴിഞ്ഞ ഒരു വര്‍ഷക്കാലമായി അഭ്യൂഹങ്ങളുണ്ടായിരുന്നു. എന്നാല്‍ ആരും തന്നെ വിഷയത്തില്‍ ഔദ്യോഗിക പ്രതികരണങ്ങള്‍ നടത്തിയിരുന്നില്ല. ജയം രവിക്കൊപ്പമുള്ള ചിത്രങ്ങള്‍ ആര്‍തി ഇന്‍സ്റ്റഗ്രാമില്‍ നിന്നും നീക്കം ചെയ്തതോടെയാണ് അഭ്യൂഹങ്ങള്‍ ശക്തമായത്. എന്നാല്‍ മാരീഡ് ടു ജയം രവി എന്ന ഇന്‍സ്റ്റഗ്രാം ബയോ ആര്‍തി ഇതുവരെയും മാറ്റിയിട്ടില്ല. ജയം രവിയുടെ ഇന്‍സ്റ്റഗ്രാമില്‍ ആരതിക്കും മക്കള്‍ക്കുമൊപ്പമുള്ള ചിത്രങ്ങളുണ്ട്.