ജീവിതത്തിലെ മോശം സമയത്ത് തനിക്ക് കൈത്താങ്ങായത് രാഹുല്‍ ഗാന്ധിയാണെന്ന് മുന്‍ ലോക്‌സഭാംഗവും കന്നഡ നടിയുമായ ദിവ്യ സ്പന്ദന. ആത്മഹത്യ ചെയ്യുന്നതിനെ കുറിച്ച് പോലും ചിന്തിച്ചിട്ടുണ്ടെന്നും ആ സമയത്ത് രാഹുല്‍ മാനസിക പിന്തുണ നല്‍കിയെന്നും ദിവ്യ സ്പന്ദന തുറന്നുപറഞ്ഞു. 'വീക്കെന്‍ഡ് വിത്ത് രമേഷ്, സീസണ്‍ 5' എന്ന കന്നഡ ടോക്ക് ഷോയുടെ എപ്പിസോഡിലാണ് ദിവ്യ ഇക്കാര്യം തുറന്നുപറഞ്ഞത്.
' എന്റെ അച്ഛന്‍ മരിച്ച് രണ്ടാഴ്ചയ്ക്ക് ശേഷം ഞാന്‍ പാര്‍ലമെന്റില്‍ എത്തി. എനിക്ക് ആരെയും ഒന്നും അറിയില്ലായിരുന്നു. പാര്‍ലമെന്റ് നടപടികളെ കുറിച്ച് ഒരു ധാരണയും ഉണ്ടായിരുന്നില്ല,' ദിവ്യ പറഞ്ഞു.
' മാണ്ഡ്യയിലെ ജനങ്ങളാണ് എനിക്ക് ആത്മവിശ്വാസം നല്‍കിയത്. ആത്മഹത്യ ചെയ്യണമെന്ന തോന്നലുണ്ടായപ്പോള്‍ രാഹുല്‍ ഗാന്ധിയാണ് വൈകാരികമായി പിന്തുണച്ചത്. എന്റെ ജീവിതത്തില്‍ ഏറ്റവുമധികം സ്വാധീനിച്ചത് എന്റെ അമ്മയാണ്, അടുത്തത് എന്റെ പിതാവാണ്, മൂന്നമത്തേത് രാഹുല്‍ ഗാന്ധി,' ദിവ്യ കൂട്ടിച്ചേര്‍ത്തു.