മുംബൈ ആഡംബര കപ്പലിലെ ലഹരിപ്പാര്‍ട്ടിയുമായി ബന്ധപ്പെട്ട് മകന്‍ ആര്യന്‍ ഖാന്‍ അറസ്റ്റിലായതിനു പിന്നാലെ ഷാരൂഖ് ഖാന്‍ അഭിനയിച്ച പരസ്യങ്ങളുടെ സംപ്രേഷണം താല്‍ക്കാലികമായി നിര്‍ത്തിവച്ച് ബൈജൂസ് ലേണിങ് ആപ്പ്. ട്വിറ്റര്‍ ഉള്‍പ്പെടെയുള്ള സമൂഹമാധ്യമങ്ങളില്‍ ഷാരൂഖ് ഖാനെതിരെ പ്രതിഷേധം ഉയര്‍ന്നിരുന്നു. ബൈജൂസ് ആപ്പ് പരസ്യങ്ങളില്‍ നിന്ന് ഷാരൂഖ് ഖാനെ ഒഴിവാക്കണമെന്നാണ് പലരുടെയും ആവശ്യം. ഇതിനു പിന്നാലെയാണ് ബൈജൂസ് ആപ്പിന്റെ നടപടി. ദേശീയ മാധ്യമമായ ഇക്കണോമിക് ടൈംസ് ആണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്.
