തമിഴിലെ പ്രശസ്ത സംവിധായകന്‍ ഗൌതം വാസുദേവ് മേനോന്‍ മലയാള സിനിമയില്‍ അഭിനയിക്കുന്നു. നിവിന്‍ പോളി നായകനാകുന്ന ‘ജേക്കബിന്‍റെ സ്വര്‍ഗരാജ്യം’ എന്ന ചിത്രത്തിലാണ് ഗൌതം മേനോന്‍ അഭിനയിക്കുന്നത്. വില്ലന്‍ കഥാപാത്രത്തെയാണ് ഗൌതം മേനോന്‍ അവതരിപ്പിക്കുന്നത് എന്നാണ് ആദ്യസൂചന.
വിനീത് ശ്രീനിവാസന്‍ സംവിധാനം ചെയ്യുന്ന ഈ ചിത്രം അടുത്ത വര്‍ഷം വേനല്‍ക്കാലത്ത് പ്രദര്‍ശനത്തിനെത്തിക്കാനാണ് പദ്ധതി. നോബിള്‍ ബാബു തോമസ് ആണ് ചിത്രം നിര്‍മ്മിക്കുന്നത്. ജേക്കബ് എന്ന ടൈറ്റില്‍ കഥാപാത്രത്തെ നിവിന്‍ പോളി അവതരിപ്പിക്കും.
സായ്കുമാര്‍, ടി ജി രവി, രണ്‍‌ജി പണിക്കര്‍, ശ്രീനാഥ് ഭാസി, ദിനേഷ് പ്രഭാകര്‍, ലക്ഷ്മി രാമകൃഷ്ണന്‍ തുടങ്ങിയവരും ഈ സിനിമയില്‍ അഭിനയിക്കുന്നു. ചിത്രത്തിലെ നായികയെ തീരുമാനിച്ചിട്ടില്ല.
അതേസമയം, ഗൌതം മേനോന്‍ സംവിധാനം ചെയ്യുന്ന ആദ്യ മലയാള ചിത്രത്തിലും നായകന്‍ നിവിന്‍ പോളിയാണ്.
വിനീത് ശ്രീനിവാസന്‍ സംവിധാനം ചെയ്ത മലര്‍വാടി ആര്‍ട്സ് ക്ലബ്, തട്ടത്തിന്‍ മറയത്ത് എന്നീ സിനിമകളില്‍ നിവിന്‍ പോളി അഭിനയിച്ചിട്ടുണ്ട്. വിനീത് തിരക്കഥയെഴുതിയ ഒരു വടക്കന്‍ സെല്‍‌ഫിയിലും നിവിന്‍ ആയിരുന്നു നായകന്‍.