തന്നെ സീരിയല്‍ രംഗത്തുനിന്ന് വിലക്കിയിരിക്കുന്നത് ഗണേഷാണെന്നാണ് തിലകന്‍ വിശ്വസിക്കുന്നത്. അതുകൊണ്ടുതന്നെ മത്സരിച്ചാല്‍ അത് രണ്ടു വ്യക്തികള്‍ തമ്മിലുള്ള യുദ്ധമായി മാറാനിടയുണ്ട്. സിനിമാരംഗത്ത് ഇപ്പോള്‍ നിലനില്‍ക്കുന്ന അസ്വസ്ഥത വളരാനും അത് ഇടയാക്കും. അതുകൊണ്ടുതന്നെയാണ് മുകേഷിനെപ്പോലെ ക്ലീന്‍ ഇമേജുള്ള ഒരാളെ പത്തനാപുരത്തിറക്കാന്‍ സി പി ഐ തീരുമാനിച്ചിരിക്കുന്നത്.
കൊല്ലം സ്വദേശിയാണ് മുകേഷ്. ഇപ്പോള്‍ സംഗീത നാടക അക്കാദമിയുടെ ചെയര്‍മാനാണ്. പരമ്പരാഗത കമ്യൂണിസ്റ്റ് കുടുംബത്തിലെ അംഗം. മാത്രമല്ല നാടകാചാര്യന്‍ ഒ മാധവന്‍റെ മകന്‍. അച്ഛന്‍റെ പേരിലുള്ള ട്രസ്റ്റിലൂടെ അനവധി ജനോപകാര പ്രവര്‍ത്തനങ്ങള്‍ക്ക് നേതൃത്വം നല്‍കുന്നു. ടി വി ഷോകളിലൂടെ കുടുംബ പ്രേക്ഷകര്‍ക്ക് പ്രിയങ്കരന്‍. ഈ ഗുണങ്ങളെല്ലാം മുകേഷിന് തെരഞ്ഞെടുപ്പില്‍ സഹായകമാകുമെന്ന കണക്കുകൂട്ടലിലാണ് സി പി ഐ.
അതേസമയം, ചാലക്കുടിയില്‍ കലാഭവന്‍ മണി സി പി എം സ്ഥാനാര്‍ത്ഥിയായി മത്സരിക്കുമെന്നും സൂചനയുണ്ട്. പത്മജാ വേണുഗോപാലായിരിക്കും അവിടെ മണിയുടെ എതിര്‍ സ്ഥാനാര്‍ത്ഥി. നടന്‍ ജഗദീഷിനെ മത്സരരംഗത്തിറക്കാന്‍ കോണ്‍ഗ്രസും ആലോചിക്കുന്നുണ്ട്.