നടന്ന് പോകുമ്പോഴോ മറ്റോ പെട്ടെന്നൊരു തളര്‍ച്ച.ഒന്നിനും ഒരു ഉന്മേഷമില്ലായ്മ.എന്നാലൊന്ന് ഡോക്ടറെ കണ്ടേക്കാം.പരിശോധിച്ചപ്പോഴാണ് രക്തമ്മര്‍ദ്ദമുണ്ടെന്ന് മനസിലാക്കാനായത്. ഇനി എന്താ ചെയ്യുക ?
ഇപ്പോഴത്തെ കാലത്ത് മിക്കവര്‍ക്കും ഉളളതാണ് ഉയര്‍ന്ന രക്തസമ്മര്‍ദ്ദം.എന്താണ് രക്ത സമ്മര്‍ദ്ദം എന്ന് നോക്കാം.സാധാരണയിലധികം സമ്മര്‍ദ്ദത്തോടെ ഞരമ്പുകളിലൂടെയും ധമനികളിലൂടെയും രക്തം പ്രവഹിക്കാന്‍ ഇടയാക്കുന്ന അവസ്ഥയാണ് രക്തസമ്മര്‍ദ്ദം.ധമനികളില്‍ കൊഴുപ്പ് അടിയുന്നതും കാരണമാണ്.
ഉചിതമായ ജീവിത ശൈലിയും കൃത്യമായി മരുന്നുകള്‍ കഴിക്കുന്നതും രക്തസമ്മര്‍ദ്ദം നിയന്ത്രിച്ച് നിര്‍ത്തുന്നതിന് സഹായിക്കും. എന്നാല്‍, അസുഖത്തെ വകവയ്ക്കാതിരുന്നാല്‍ ഗുരുതരമായ സ്ഥിതി വിശേഷത്തിലേക്ക് കാര്യങ്ങള്‍ നീങ്ങും.
ആയുര്‍വേദത്തില്‍ ഉയര്‍ന്ന രക്തസമ്മര്‍ദ്ദത്തിന് രക്ത ഗത വാതം എന്നാണ് പേര്.ത്രിദോഷങ്ങള്‍ അധികരിക്കുന്നത് മൂലം രക്തസമ്മര്‍ദ്ദമുണ്ടാകാം.എന്നാല്‍, രക്ത ചംക്രമണത്തിന് ഉത്തരവാദിയായ വാത ദോഷത്തിനാണ് കൂടുതല്‍ പ്രാധാന്യം.
ചികിത്സ
ഉയര്‍ന്ന രക്ത സമര്‍ദ്ദം ചികിത്സിക്കുന്നതിനായി ആഹാര നിയന്ത്രണം അത്യാവശ്യമാണ്.ഭക്ഷണത്തില്‍ ഉപ്പ് കുറയ്ക്കുകയോ പൂര്‍ണ്ണമായും ഒഴിവാക്കുകയോ വേണം. ചൂട് കൂടിയതും മസാല ചേര്‍ത്തതുമായ ഭക്ഷനവും ഒഴിവാക്കേണ്ടതുണ്ട്.
കടുകെണ്ണ,ഒലീവ് എണ്ണ എന്നിവ ഉപയോഗിക്കാം.എരുമപ്പാല്‍ വര്‍ജ്ജിക്കേണ്ടതാണ്.നാരുകള്‍ അടങ്ങിയ ഭക്ഷണം കഴിക്കുന്നത് ദഹനത്തിന് സഹായകമാകും.ഇലക്കറികള്‍ ധാരാളം കഴിക്കുക.
പാവയ്ക്ക, മുരിങ്ങക്ക എന്നിവ ഉയര്‍ന്ന രക്തസമ്മര്‍ദ്ദം നിയന്ത്രിക്കാന്‍ സഹായിക്കും.ചേമ്പ് നന്നല്ല.എന്നാല്‍, മത്തങ്ങ കഴിക്കുന്നത് പ്രയോജനപ്രദമാണ്.
ഫലവര്‍ഗ്ഗങ്ങളില്‍ നേന്ത്രപ്പഴം, ഓറഞ്ച്,പേരയ്ക്ക, ആപ്പിള്‍ എന്നിവ കഴിക്കുന്നത് ഗുണകരമാണ്.ഉണങ്ങിയ പഴങ്ങളും ബദാം എന്നിവയും പ്രയോജനം ചെയ്യും.മധുരപലഹാരങ്ങളും ചോക്‍ളേറ്റുകളും ഒഴിവാക്കണം.മാംസാഹാ‍രം വര്‍ജ്ജിക്കേണ്ടതാണ്.എന്നാല്‍, മത്സ്യം കഴിക്കുന്നത് ഗുണകരമാണ്.
ആയുര്‍വേദത്തില്‍ സര്‍പ്പഗന്ധി ചേര്‍ന്ന മരുന്നുകളാണ് സാധാരണ രക്തസമ്മര്‍ദ്ദത്തിന് നല്‍കുന്നത്. അലോപ്പതിയിലും സര്‍പ്പഗന്ധി ഉപയോഗിക്കുന്നുണ്ട്.
