കൊച്ചി സ്‌മാര്‍ട് സിറ്റിയുടെ ഉദ്ഘാടനം ഫെബ്രുവരി അവസാനവാരം

കേരളം കാത്തിരുന്ന കൊച്ചി സ്മാര്‍ട് സിറ്റിയുടെ ഉദ്‌ഘാടനം ഫെബ്രുവരി അവസാനവാരം നടക്കും. ദുബായില്‍ ചേര്‍ന്ന ഡയറക്‌ടര്‍ ബോര്‍ഡ് യോഗത്തിലാണ് ഇതു സംബന്ധിച്ച് തീരുമാനമായത്. ഉദ്ഘാടന തിയതി സംബന്ധിച്ച് ഒരാഴ്ചയ്ക്കകം പ്രഖ്യാപനം ഉണ്ടാകും.

ഉദ്ഘാടന ചടങ്ങില്‍ യു എ ഇ വൈസ് പ്രസിഡന്‍റും പ്രധാനമന്ത്രിയും ദുബായ് ഭരണാധികാരിയുമായ ഷെയ്‌ഖ് മുഹമ്മദ് ബിന്‍ റാശിദ് ആല്‍ മക്തൂം പങ്കെടുത്തേക്കും എന്നാണ് റിപ്പോര്‍ട്ടുകള്‍. ഈ സാഹചര്യത്തില്‍ അദ്ദേഹത്തിന്റെ സൗകര്യം കൂടി കണക്കിലെടുത്തായിരിക്കും ഉദ്ഘാടന തിയതി തീരുമാനിക്കുക.

ദുബായ് എമിറേറ്റ് ടവേഴ്സ് ഓഫിസ് ടവറില്‍ നടന്ന യോഗത്തില്‍ സംസ്ഥാന വ്യവസായ മന്ത്രി പി കെ കുഞ്ഞാലിക്കുട്ടി, ദുബായ് ടീകോം സി ഇ ഒ ജാബിര്‍ ബിന്‍ ഹാഫീസ്, സ്മാര്‍ട്ട് സിറ്റി സി ഇ ഒ ഡോ. ബാജു ജോര്‍ജ്, പ്രത്യേക ക്ഷണിതാവായി വ്യവസായി എം എയൂസഫലി എന്നിവര്‍ പങ്കെടുത്തു.

246 ഏക്കറില്‍ നിര്‍മ്മിക്കുന്ന സ്മാര്‍ട് സിറ്റി പദ്ധതിയുടെ ആദ്യഘട്ടം അന്തിമഘട്ടത്തിലാണ്. ആറര ലക്ഷം ചതുരശ്ര അടിയാണ് എസ് സി കെ - 01 എന്ന ആദ്യ ഐ ടി ടവറിന്റെ വിസ്തീര്‍ണം. ഇത് തുറക്കുന്നതോടെ 5000 പേര്‍ക്കോളം തൊഴില്‍ ലഭിക്കുമെന്നാണ് റിപ്പോര്‍ട്ട്.