ലണ്ടന്‍ ഒളിംപിക്സില്‍ ബാഡ്‌മിന്റണ്‍ സിംഗിള്‍സില്‍ വെങ്കലമെഡല്‍ നേടിയ സൈന നേവാള്‍ കൃത്യം രണ്ടു വര്‍ഷത്തിനു ശേഷം 2014ലാണ് പുല്ലേല ഗോപിചന്ദിന്റെ ബാഡ്‌മിന്റണ്‍ അക്കാദമി വിട്ടുപോയത്. കായികലോകം, അമ്പരപ്പോടെയും ഞെട്ടലോടെയുമായിരുന്നു ആ വാര്‍ത്ത കേട്ടത്. ഗോപിചന്ദ് അക്കാദമി വിട്ടശേഷം ബംഗളൂരുവില്‍ വിമല്‍ കുമാറിന്റെ കീഴിലായി സൈനയുടെ പരിശീലനം.
എന്നാല്‍, സൈന അക്കാദമി വിട്ടതിന് പിന്നില്‍ താന്‍ ഒരു കാരണമാണെന്ന് കരുതുന്നില്ലെന്ന് ആയിരുന്നു സിന്ധുവിന്റെ മറുപടി. അവര്‍ക്ക് എന്താണോ വേണ്ടത് അത് അവര്‍ ചെയ്തു. അവര്‍ക്ക് വേറെ എവിടേക്കോ പോകണമായിരുന്നു, അതിനാല്‍ അവര്‍ അക്കാദമി വിട്ടു.
“എല്ലാ കളിക്കാര്‍ക്കും അദ്ദേഹം പരിശീലനം നല്കുന്നത് ഒരുപോലെയാണ്. സൈന അക്കാദമി വിടുന്ന സമയത്ത് ഞാന്‍ വളരെ ജൂനിയര്‍ ആയിരുന്നു. ആ സമയത്ത്, രാവിലെ അദ്ദേഹം ആദ്യം പരിശീലനം നല്കുന്നത് സൈന നേവാളിന് ആയിരുന്നു. ഓരോ കളിക്കാര്‍ക്കും തുല്യമായ പരിഗണന ആയിരുന്നു ഗോപിസര്‍ നല്കിയിരുന്നത്” - സിന്ധു വ്യക്തമാക്കി.
