ലോക രണ്ടാം നമ്പര്‍ താരം റാഫേല്‍ നദാല്‍ മാഡ്രിഡ് മാ‍സ്റ്റേഴ്‌സ് ഓപ്പണ്‍ ടെന്നീസിന്‍റെ രണ്ടാം റൌണ്ടിലേക്ക് കടന്നു. ബുധനാഴ്ച നടന്ന പോരാട്ടത്തില്‍ മാര്‍ക്കസ് ബാഗ്‌ദാറ്റിസിനെയാണ് നദാല്‍ മറികടന്നത്. 6-4, 6-4 എന്ന സ്കോറീനായിരുന്നു സ്പാനിഷ് താരത്തിന്‍റെ ജയം.
പരുക്ക് മൂലം യു എസ് ഓപ്പണില്‍ നിന്നും മാറിനിന്ന നദാല്‍ ഏറെ നാളുകള്‍ക്ക് ശേഷമാണ് ടെന്നീസ് കോര്‍ട്ടിലേക്ക് മടങ്ങിയെത്തുന്നത്. രണ്ടാം നമ്പര്‍ താരം നദാലിനു അടുത്ത റൌണ്ടില്‍ ബ്രിട്ടീഷ് താരം ആന്‍ഡി മുറേയെ നേരിടും. ഓസ്ട്രേലിയന്‍ ഓപ്പണില്‍ ഇരുവരും തമ്മില്‍ ഏറ്റുമുട്ടിയ മത്സരം അഞ്ചു സെറ്റുകള്‍ക്കു ശേഷമാണ് തീരുമാനമായത്.
സ്പാനിഷ് താരം ഫെര്‍ണാണ്ടോ വെര്‍ദെസ്ക്കോയെ പരാജയപ്പെടുത്തിയ ലോക മൂന്നാം നമ്പര്‍ താരം നോവാക്ക് ജോക്കോവിക്കും മാഡ്രിഡ് മാസ്റ്റേഴ്സില്‍ വിജയം കണ്ടെത്തി. 6-3, 6-3 നായിരുന്നുജോക്കോവിക്കിന്‍റെ ജയം.
ഞായറാഴ്ച വീയെന്നയില്‍ കിരീടം നേടിയ ജോക്കോവിക്ക് ഈസീസണിലെ തന്‍റെ അഞ്ചാമത്തെ കിരീടത്തിലേക്ക് കയറിയിരുന്നു. തുടര്‍ച്ചയായി സ്പാനിഷ് താരങ്ങള്‍ക്കെതിരെ രണ്ടാമത്തെ ജയവും വിയെന്നയിലെ ഫൈനലില്‍ ജോക്കോവിക്ക് പരാജയപ്പെടുത്തിയത് പതിനാലാം സീഡായ കാര്‍ലോസ് മോയയെയാണ്.