ഇന്ത്യന് താരങ്ങളായ ലിയാണ്ടര് പേസും മഹേഷ് ഭൂപതി യും വ്യത്യസ്ത സഖ്യങ്ങളോടൊപ്പം യുഎസ് ഓപ്പണ് ടെന്നീസ് ക്വാര്ട്ടറിലെത്തി. പേസ്- ലൂക്കാസ് ലോഹി സഖ്യം പരാജയപ്പെടുത്തിയത് അര്ജന്റീനക്കാരനായ എഡ്വാര്ഡോ ഷ്വാങ്ക് ഇറ്റാലിയന് പൊട്ടിറ്റോ സ്റ്റാറേസ് സഖ്യത്തോടായിരുന്നു.
ഭൂപതി ബഹാമസ് താരം മാര്ക്ക് നോവല്സ് സഖ്യം പരാജയപ്പെടുത്തിയത് സ്വിറ്റ്സര് ലന്ഡിലെ വെസ് അലീഗ്രോ - റുമാനിയന് താരം ഹൊരിയാ ടേക്കൂ സഖ്യത്തെയായിരുന്നു. 6-3, 6-3 എന്ന സ്കോറിലായിരുന്നു ഇന്തോ-ബഹാമസ് സഖ്യത്തിന്റെ വിജയം. പേസ്-ളോഹി സഖ്യം 6-4, 1-6, 6-3 എന്ന സ്കോറിനു വിജയം കണ്ടെത്തി.
സിംഗിള്സില് മുന് ലോക ഒന്നാം നമ്പര് താരം റോജര് ഫെഡറര് നാലാം റൌണ്ടിലെത്തി. ബ്രസീലിയന് ക്വാളിഫയറായ തിയാഗോ ആല്വെസിനെയാണ് സ്വിസ് താരം പരാജയപ്പെടുത്തിയത്. രണ്ട് മണീക്കൂര് നീണ്ടു നിന്ന മത്സരത്തില് 6-3, 7-5, 6-4 എന്ന സ്കോറിനായിരുന്നു വിജയം. മത്സരത്തില് 19 എയ്സുകളാണ് താരം പറത്തിയത്.
റെഡാക്ക് സ്റ്റെഫാനെക്കാണ് അടുത്ത മത്സരത്തില് ഫെഡററുടെ എതിരാളി. ക്രിസ് ഗുക്കിയോനെ 6-4 6-4 6-7 (3-7) 6-2 എന്ന സ്കോറിന് സ്റ്റെഫാനെക്ക് പരാജയപ്പെടുത്തി. മിക്കവാറും സെമിയില് നോവാക്ക് ജോക്കോവിക്കാകും ഫെഡറര്ക്ക് എതിരാളി. അമേരിക്കന് താരം കെന്ഡ്രിക്കിനെ പരാജയപ്പെടുത്തിയ ജോക്കോവിക്കിന് അടുത്ത എതിരാളി ക്രൊയേഷ്യന് താരം മാര്ട്ടിന് സിലിക്കാണ്.
നിക്കോളെ ഡാവിഡെങ്കോ, ആന്ദ്രേസ് സിപ്പി, ദിമിത്രി തുര്സ്നോവ്, ജൈല്സ് മുള്ളര്, ടോമി റൊബ്രേഡോ, ജോ വില്ഫ്രഡ് സോംഗ, ഫെര്ണാണ്ടോ ഗോണ്സാലസ്, ജര്ക്കോനിയേമാന് എന്നിവരാണ് നാലാം റൌണ്ടില് കടന്ന മറ്റ് പ്രമുഖര്.