കഴിഞ്ഞ ഗെയിംസില്‍ എക്കാലത്തെയും മികച്ച പ്രകടനം നടത്തിയ ഇന്ത്യ ഇത്തവണ നിരാശയുടെ മെഡലുകളാണ് സമ്മാനിച്ചത്. എന്നാല്‍ ഏറെക്കാലമായി ചില ഇനങ്ങളില്‍ അകന്നു നിന്ന മെഡലുകള്‍ ഇക്കുറി ഇന്ത്യ നേടി. പ്രത്യേകിച്ച് ഹോക്കിയിലെയും സ്ക്വാഷിലെയും സ്വര്‍ണവും ബാഡ്മിന്റനിലെ വെങ്കലവും നേട്ടങ്ങളാണ്. എന്നാല്‍ അത്‌ലറ്റിക്സിലും ഷൂട്ടിങ്ങിലും ബോക്സിങ്ങിലും ഗുസ്തിയിലും ഇടക്കാലത്ത് കൈവരിച്ച നേട്ടത്തിന് അടുത്തെത്താന്‍ ഇന്ത്യയ്ക്കായില്ല. കഴിഞ്ഞ ഗെയിംസിലെ 14 സ്വര്‍ണം ഇഞ്ചോണിലെത്തിയപ്പോള്‍ 11 ആയി, 17 വെള്ളിമെഡലുകള്‍ പത്തായി. ഇഞ്ചോണിലെ വെങ്കലനേട്ടം 37 ആണ്. ഇതില്‍ പതിനൊന്ന് വെങ്കലവും സെമിവരെ എത്തിയതിനാണ്. ബോക്സിങ്, ബാഡ്മിന്റന്‍, സ്ക്വാഷ്, വുഷു, ടെന്നിസ് എന്നീ ഇനങ്ങളിലാണ് ഇന്ത്യ സെമിയിലെത്തി വെങ്കലനേട്ടം കൈവരിച്ചത്.
