പ്രണയത്തില്‍ ആശയ വിനിമയത്തിന് എന്തെങ്കിലും പ്രാധാന്യമുണ്ടോ? കണ്ണും കണ്ണും കഥ പറയുമ്പോള്‍ പിന്നെന്ത് ആശയവിനിമയം എന്നാകും. എന്നാല്‍ സുദൃഡമായ ബന്ധത്തിന് ആശയവിനിമയം ഒരു മുഖ്യ ഘടകമാണെന്ന് മനശ്ശാസ്ത്ര വിദഗ്‌ദര്‍. പരസ്പരം മനസ്സിലാക്കാനും ബന്ധം സുദൃഡമായി കാത്തു സൂക്ഷിക്കാനും എല്ലാ അര്‍ത്ഥത്തിലും ആത്‌മ വിശ്വാസം വളര്‍ത്താനും പരസ്പരമുള്ള ആഴത്തിലേക്ക് ഇറങ്ങാനും ആശയവിനിമയം കൂടിയേ തീരൂ.
പരസ്പരം വിനോദിപ്പിക്കാനും സന്തോഷം നിലനിര്‍ത്താനും ദുഖങ്ങള്‍ പങ്കിടാനും കഴിയുമ്പോഴാണ് ഒന്നാണെന്ന ബോധത്തിലേക്ക് വരിക. ഒറ്റപ്പെടല്‍ എന്ന വികാരം അനുഭവപ്പെടുന്നതിന് മികച്ച ആശയ വിനിമയം ഇല്ലാത്തതും പരസ്പരം സൌഹൃദം ഇല്ലായ്‌മയും ഒരു പ്രധാന കാരണമാണ്. എന്നിരുന്നാലും ആശയ വിനിമയത്തിലെ ചില അപകട സാധ്യതകള്‍ തിരിച്ചറിയേണ്ടതുണ്ട്. പ്രണയബന്ധത്തിന്‍റെ സ്വരച്ചേര്‍ച്ചയെ അപകടപ്പെടുത്തുന്ന ചിലത്.
അവയെ തിരിച്ചറിയുന്നത് ചിലപ്പോള്‍ നന്നായിരിക്കും. പെണ്‍കുട്ടികള്‍ ആണെങ്കില്‍ പങ്കാളിയെ അസ്വാതന്ത്ര്യനാക്കുന്നത് അവന്‍ ഇഷ്ടപ്പെടുന്നില്ല എന്നത് മനസ്സിലാക്കുക. നിങ്ങള്‍ സ്നേഹം കൊണ്ട് അവനെ കീഴടക്കുമെങ്കിലും എപ്പോഴും കൂടെയിരിക്കണമെന്നും കൂടെയുണ്ടാകണമെന്ന ചിന്തയും അവനെ മുഷിപ്പിക്കും തീര്‍ച്ച.
വിശ്വാസ്യത ഇല്ലായ്‌മയും പൊതു സ്ഥലത്ത് അപമാനിക്കുന്നതും സഹതാപ തരംഗത്തിനായി എപ്പോഴും പരിതാപം പറയുന്നതും ഒരു പക്ഷേ നിങ്ങളുടെ പെണ്‍കുട്ടിയെ ബോറടിപ്പിച്ചേക്കാം. നിങ്ങള്‍ ഒന്നിലധികം പങ്കാളിയെ തേടുന്നവനാണെന്ന് തോന്നലും തന്നെ പരിഗണിക്കുന്നില്ല എന്ന തോന്നലും പെണ്‍കുട്ടിക്ക് ഇഷ്ടക്കേട് വരുത്തും.
PRO
PRO
ഇവയ്‌ക്കൊക്കെ പുറമേ സമൂഹവുമായി ബന്ധപ്പെട്ട ആശയ വിനിമയത്തിലൂടെ ബന്ധങ്ങള്‍ തകര്‍ക്കുന്ന ചില കാര്യങ്ങള്‍ കൂടി. തെറ്റായ സ്വാധീനം നല്‍കുന്ന സുഹൃത്തുക്കള്‍, അടുപ്പമുള്ളവരില്‍ എല്ലാറ്റിലും കുറ്റം കാണുന്നവര്‍. നിങ്ങള്‍ക്കിടയിലെ പരസ്പര ബഹുമാനം നശിക്കുന്ന പ്രവര്‍ത്തികള്‍ എന്നിവയുടെ പിന്നാലെ പോകുന്നതും ബന്ധത്തെ അപകടപ്പെടുത്തും.
പുറമേ നിങ്ങളിലെ തന്നെ ചില മോശം കാര്യങ്ങളും പങ്കാളിയുമായുള്ള നിങ്ങളുടെ ആശയവിനിമയത്തെ പരാജയപ്പെടുത്തിയേക്കാം. ലജ്ജാശീലം, സ്വാര്‍ത്ഥത, ഇല്ലാത്തത് ഉണ്ടെന്ന് നടിക്കല്‍, പങ്കാളിയെ മനസ്സിലാക്കാതെ കുറ്റപ്പെടുത്തുക തുടങ്ങിയ കാര്യങ്ങളും നല്ല ബന്ധത്തെ തകര്‍ക്കുന്നതും നിങ്ങളിലെ വിശ്വാസത്തെ നശിപ്പിക്കുന്നതുമാണ്.
തുറന്ന ആശയവിനിമയം ബന്ധത്തെ കൂടുതല്‍ ദൃഡവും മനോഹരവുമാക്കും. സാഹചര്യത്തിന് അനുസരിച്ച് ദിനം പ്രതിയോ, ആഴ്ചയില്‍ ഒന്നോ, മാസത്തില്‍ ഒന്നോ സ്വന്തമെന്ന് കരുതുന്ന ആളുമായി ആശയവിനിമയം നടത്തുക. നേരിടുന്ന സാഹചര്യങ്ങള്‍ പരസ്പരം വിശകലനം ചെയ്യുക, പ്രശ്‌നങ്ങള്‍ പരിഹരിക്കാനാകുമോ എന്ന് ചിന്തിക്കുക തുടങ്ങിയ കാര്യങ്ങള്‍ ബന്ധത്തെ ഊട്ടി ഉറപ്പിക്കുകയും താന്‍ ഒറ്റയ്‌ക്കല്ലെന്ന എന്ന തോന്നല്‍ ദൃഡമാക്കാനും സഹായിക്കും.
മറക്കുക, പൊറുക്കുക എന്നത് ബന്ധങ്ങള്‍ വിടരാന്‍ ഏറ്റവും ഉത്തമം തന്നെയാണ്. ഉറങ്ങുന്നതിനു മുമ്പ് തന്നെ പരസ്പരം പ്രശ്‌നങ്ങള്‍ പറഞ്ഞു തീര്‍ക്കുക. നല്ല ബന്ധം വളരാന്‍ പരസ്പരം കൂടുതല്‍ സമയം ചെലവഴിക്കുന്നത് കൂടി നന്നായിരിക്കും. തങ്ങള്‍ക്കിടയിലെ അഭിപ്രായ ഐക്യങ്ങള്‍ കണ്ടു പിടിക്കാനും ഇഷ്ടക്കേടുകളും പ്രിയങ്ങളും തിരിച്ചറിയാനും ഈ സമയം വിനിയോഗിക്കാനാകും.
