നാല് ആൺകുട്ടികളുടെ സ്വകാര്യ ഭാഗങ്ങളിൽ മുളകുപൊടി വിതറിയെന്ന പരാതിയിൽ 55 കാരിയെ പൊലീസ് അറസ്റ്റ് ചെയ്തു. ഉത്തർപ്രദേശിലെ അലിഗഡിലാണ് സംഭവം. ആറ് മുതൽ എട്ടുവയസ്സുവരെ പ്രായമുള്ള ആൺകുട്ടികളാണ് സ്ത്രീകളുടെ ആക്രമണത്തിന് ഇരയായതെന്ന് പൊലീസ് പറഞ്ഞു. കുട്ടികളുടെ ബന്ധുക്കൾ നൽകിയ പരാതിയിൽ മുന്നി ദേവി എന്ന സ്ത്രീയാണ് അറസ്റ്റിലായത്. അവരുടെ ചെറുമകളെ ആൺകുട്ടികൾ ലൈംഗീകമായി ഉപദ്രവിക്കുമോയെന്ന ആശങ്കയെ തുടർന്നാണ് ഉപദ്രവിച്ചതെന്നാണ് നിഗമനം.
നാല് ആണ്‍കുട്ടികള്‍ക്കൊപ്പം മുന്നി ദേവിയുടെ ചെറുമകൾ കഴിഞ്ഞ ദിവസം വീടിനടുത്തുനിന്ന് കളിച്ചിരുന്നു. ഇതുകണ്ട അവര്‍ ആണ്‍കുട്ടികളെ വീടിനുള്ളിലേക്ക് വിളിച്ചശേഷം സ്വകാര്യ ഭാഗങ്ങളില്‍ മുളകുപൊടി വിതറിയെന്നാണ് പരാതി. ആണ്‍കുട്ടികള്‍ ഉറക്കെ നിലവിളിച്ചതോടെ അയല്‍ക്കാര്‍ വിവരം തിരക്കുകയും പൊലീസിനെ വിവരം അറിയിക്കുകയും ചെയ്തു. തുടര്‍ന്ന് കുട്ടികളെ പൊലീസ് വൈദ്യ പരിശോധനയ്ക്ക് വിധേയരാക്കി.
