ഉദയനിധി സ്റ്റാലിന് പുതിയ റോൾ, കായികമന്ത്രിയായി സത്യപ്രതിജ്ഞ ചെയ്തു

തമിഴ്‌നാട് മുഖ്യമന്ത്രി എം കെ സ്റ്റാലിൻ്റെ മകനും ഡിഎംകെ യൂത്ത് വിങ് സെക്രട്ടറിയും നടനുമായ ഉദയനിധി സ്റ്റാലിൻ മന്ത്രിയായി സത്യപ്രതിജ്ഞ ചെയ്തു. ബുധനാഴ്ച രാവിലെ രാജ്ഭവനിൽ നടന്ന ചടങ്ങിൽ ഗവർണർ ആർഎൻ രവി സത്യവാചകം ചൊല്ലിക്കൊടുത്തു. കായികവകുപ്പ് മന്ത്രിയായാണ് ഉദയനിധി സ്ഥാനമേറ്റത്.

ഉദയനിധി കൂടി മന്ത്രിസഭയിലെത്തുന്നതോടെ തമിഴ്‌നാട് മന്ത്രിസഭയിലെ മന്ത്രിമാരുടെ എണ്ണം 34 ആയി ഉയരും. തമിഴ്‌നാട് മന്ത്രിസഭയിലെ ഏറ്റവും പ്രായം കുറഞ്ഞ മന്ത്രിമാരിൽ മൂന്നാമനാണ് 45കാരനായ ഉദയനിധി. 37 വയസ്സുള്ള വിനോദസഞ്ചാരവകുപ്പ് മന്ത്രിയാണ് മന്ത്രിസഭയിലെ ഏറ്റവും പ്രായം കുറഞ്ഞ അംഗം.