ഇന്ത്യാ പാക് അതിര്‍ത്തിയിലെ ചെനാബ് നദിയില്‍ പട്രോളിങ്ങിനിടെ ഒഴിക്കില്‍പ്പെട്ട് പാക് അതിര്‍ത്തിയിലേക്ക് ഒഴുകിപ്പോയ ബിഎസ്എഫ് ജവാന്‍ സത്യശീല്‍ യാദവിനെ ഇന്ന് ഇന്ത്യയ്ക്ക് കൈമാറും. നിയന്ത്രണരേഖയിലെ സുന്ദര്‍ബനി സെക്ടറില്‍ നടന്ന ബിഎസ്എഫിന്റെയും പാക് റേഞ്ചേഴ്സിന്റെയും കമാന്‍ഡര്‍തല ഫ്ളാഗ് മീറ്റിംഗിലാണ് യാദവിനെ കൈമാറാന്‍ ധാരണയായത്.
വെള്ളിയാഴ്ച വൈകുന്നേരം മൂന്ന് മണിക്ക് ജവാനെ കൈമാറാമെന്നാണ് ധാരണയായിരിക്കുന്നതെന്നും ബിഎസ്എഫ് വൃത്തങ്ങള്‍ അറിയിച്ചു. അതേസമയം യാദവ് സുരക്ഷിതനാണെന്നും അദ്ദേഹത്തെ സുരക്ഷാ ഏജന്‍സികള്‍ ചോദ്യം ചെയ്യലിന് വിധേയനാക്കിയിട്ടുണ്ടെന്നും പാക് സൈന്യം ഇന്ത്യയെ അറിയിച്ചു. യാദവിനെ വിട്ടുകിട്ടാനുള്ള ചര്‍ച്ചകള്‍ക്ക് ഇന്ത്യന്‍ സേന പാക് റേ‌ഞ്ചേഴ്സിനെ വ്യാഴാഴ്ച ഫ്ളാഗ് മീറ്റിംഗിനായി ക്ഷണിക്കുകയായിരുന്നു.
