ബുധനാഴ്ച രാത്രി അക്‌നൂര്‍ സെക്ടറില്‍ ഇന്ത്യന്‍ പോസ്റ്റുകള്‍ക്ക് നേരെ പാകിസ്ഥാന്‍ വെടിവച്ചിരുന്നു. അന്താരാഷ്ട്ര അതിര്‍ത്തിയിലെ അഖ്‌നോര്‍ സെക്ടറില്‍ രാത്രി 9.30 ഓടെയാണ് വെടിവയ്പ് നടത്തിയത്. ജമ്മു ജില്ലയിലെ പര്‍ഗ്‌വാളിലും കതുവ ജില്ലയിലെ ഹിരാനഗറിലും പാക് സൈന്യം ഷെല്ലാക്രമണവും വെടിവെപ്പും നടത്തി. ആക്രമണത്തിന് ഇന്ത്യന്‍ അതിര്‍ത്തി രക്ഷാസേന ശക്തമായി തിരിച്ചടി നല്‍കി. ഇന്നും ഇന്നലെയുമായി 63 സൈനിക പോസ്റ്റുകള്‍ക്ക് നേരെ പാകിസ്ഥാന്‍ ആക്രമണം നടത്തി.
സാംബ മേഖലയിലുണ്ടായ പാക് ഷെല്ലാക്രമണത്തില്‍ രണ്ട് സ്ത്രീകള്‍ കൊല്ലപ്പെടുകയും മൂന്ന് ജവാന്മാരുള്‍പ്പെടെ ഇരുപത് പേര്‍ക്ക് പരിക്കേല്‍ക്കുകയും ചെയ്തിരുന്നു. ഏറ്റുമുട്ടല്‍ രൂക്ഷമായ സാഹചര്യത്തില്‍ സാംബ, ഹിരാനഗര്‍ കത്വ മേഖലകളില്‍ നിന്ന് ഇരുപതിനായിരത്തോളം ഗ്രാമീണര്‍ പലായനം ചെയ്തു.
