റിപ്പബ്ലിക് ദിന പരേഡിലെ ചടങ്ങുകള്‍ വീക്ഷിക്കുന്നതിനായി പുറകുവശത്തെ നിരയില്‍ ഇരിപ്പിടം ലഭിച്ചതില്‍ തനിക്ക് ഒരു പരാതിയുമില്ലെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. ചടങ്ങുകള്‍ വീക്ഷിക്കുന്നതിനായി ആറാമത്തെ നിരയിലായിരുന്നു രാഹുലിനുള്ള ഇരിപ്പിടം ഒരുക്കിയിരുന്നത്. ഇതേച്ചൊല്ലി വലിയ തരത്തിലുള്ള വിവാദങ്ങള്‍ ഉയരുകയും ചെയ്തിരുന്നു.
തുടര്‍ന്നാണ് 'എവിടെയാണ് ഇരിക്കുന്നത് എന്ന കാര്യം' ഒരിക്കലും തന്നെ വിഷമിപ്പിക്കാറില്ലെന്ന പ്രസ്താവനയുമായി രാഹുല്‍ ഗാന്ധി എത്തിയത്. എന്‍ ഡി ടിവിയോടാണ് രാഹുല്‍ ഇക്കാര്യം പറഞ്ഞത്. മുതിര്‍ന്ന കോണ്‍ഗ്രസ് നേതാവും രാജ്യസഭയിലെ പ്രതിപക്ഷ നേതാവുമായ ഗുലാം നബി ആസാദിനോടൊപ്പം ആറാമത്തെ നിരയിലായിരുന്നു രാഹുലിന് ഇരിപ്പിടം ഒരുക്കിയിരുന്നത്.
അതേസമയം, നാലാംനിരയിലാണ് രാഹുലിന്റെ ഇരിപ്പിടമെന്നായിരുന്നു ആദ്യസൂചനകള്‍. എന്നാല്‍ ഔദ്യോഗിക അറിയിപ്പ് വന്ന ശേഷമാണ് ആറാംനിരയിലാണ് അദ്ദേഹത്തിന്റെ സ്ഥാനമെന്ന് വ്യക്തമായത്. അതേസമയം ബി ജെ പി ദേശീയ അധ്യക്ഷന്‍ അമിത് ഷായ്ക്ക് മുന്‍നിരയിലായിരുന്നു ഇരിപ്പിടം ലഭിച്ചത്.
