രാജ്യത്ത് നടക്കുന്ന കർഷകസമരങ്ങളുടെ പശ്ചാത്തലത്തിലാണ് പ്രധാനമന്ത്രിക്കും കേന്ദ്രസർക്കാരിനുമെതിരെ രാഹുൽ ഗാന്ധിയുടെ രൂക്ഷ വിമർശനം. ഉറ്റമിത്രങ്ങളായ മുതലാളിമാർക്കായി പണം സമ്പാദിക്കുകയാണ് പ്രധാനമന്ത്രി. തനിക്കെതിരെ നിൽക്കുന്നത് കർഷകരോ,തൊഴിലാളികളോ ഇനി മോഹൻ ഭാഗവതോ തന്നെയായാലും അവരെ ഭീകരവാദികളായി മുദ്ര കുത്തും. രാഹുൽ പറഞ്ഞു.
ഡൽഹിയിൽ കർഷകപ്രതിഷേധങ്ങൾ അവസാനിപ്പിക്കാൻ രാഷ്ട്രപതി ഇടപെടണമെന്ന് ആവശ്യപ്പെട്ട് കോൺഗ്രസ് നടത്തിയ രാഷ്ട്രപതി ഭവൻ മാർച്ചിന് നേതൃത്വം നൽകി സംസാരിക്കുകയായിരുന്നു രാഹുൽ. മുതിർന്ന കോൺഗ്രസ് നേതാക്കളായ അധീർ രഞ്ജൻ ചൗധരി,ഗുലാം നബി ആസാദ് എന്നിവർക്കൊപ്പം എത്തിയ രാഹുൽ കാർഷിക നിയമങ്ങൾക്കെതിരെ രണ്ടുകോടി പേർ ഒപ്പിട്ട മെമ്മോറാണ്ടം രാഷ്ട്രപതിക്ക് കൈമാറി.
