രണ്ടാം ഘട്ട തെരഞ്ഞെടുപ്പിന്റെ ഭാഗമായി വ്യാഴാഴ്ച്ചയായിരുന്നു ബുലന്ദ്ഷഹര്‍ മണ്ഡലത്തില്‍ വോട്ടെടുപ്പ് നടന്നത്. ഇവിടെ ബിജെപിയുടെ സിറ്റിംഗ് എംപിയായ ഭോല സിംഗും എസ്പി-ബിസ്പി-ആര്‍എല്‍ഡി സഖ്യത്തിന്റെ യോഗേഷ വര്‍മയും തമ്മിലായിരുന്നു പ്രധാന മത്സരം. യോഗേഷിന് വോട്ട് ചെയ്യാനാണ് ബിഎസ്പി അനുഭാവിയായ പവന്‍ കുമാര്‍ എന്ന ഇരുപത്തിയഞ്ചുകാരന്‍ സഹോദരനപ്പം പോളിംഗ് ബൂത്തില്‍ എത്തിയതെങ്കിലും വോട്ട് ചെയ്തത് ബിജെപി സ്ഥാനാര്‍ത്ഥിക്കും. ശാന്തിപുര്‍ പൊലീസ് സ്റ്റേഷനു പരിധിയില്‍ വരുന്ന അബ്ദുള്ളപൂര്‍ ഹല്‍സപൂര്‍ ഗ്രാമത്തിലെ ദളിത് വോട്ടറാണ് പവന്‍ കുമാര്‍.
