ജിംനാസ്‌റ്റിക് എന്നു കേട്ടാല്‍ ഭയന്നോടുന്ന ഇന്ത്യക്കാര്‍ക്കിടയില്‍ നിന്ന് ചരിത്രത്തിലാദ്യമായി ഒളിമ്പിക്‍സ് ഫൈനലില്‍ പ്രവേശിക്കുകയും നേരിയ വ്യത്യാസത്തില്‍ റിയോയില്‍ നാലാം സ്ഥാനത്തേക്ക് തള്ളപ്പെടുകയും ചെയ്ത ദീപ കര്‍മാര്‍ക്കറെ ഇന്ത്യയിലെ പരമോന്നത കായിക ബഹുമതിയായ രാജീവ് ഗാന്ധി ഖേല്‍രത്ന പുരസ്‌കാരം നല്‍കി രാജ്യം ആദരിക്കും.
ദീപയ്‌ക്കൊപ്പം ഒളിമ്പ്യന്‍ ഷൂട്ടര്‍ ജിത്തു റായ്‌ക്കും ഖേല്‍രത്ന പുരസ്‌കാരം ലഭിക്കും. റിയോയില്‍ 10 മീ. എയര്‍ പിസ്‌റ്റള്‍ വിഭാഗത്തില്‍ ഫൈനലില്‍ എത്തിയ ജിത്തുവിന് മെഡല്‍ സ്വന്തമാക്കാന്‍ സാധിച്ചില്ല. പുരസ്കാരത്തിന് ജിത്തു അര്‍ഹമാകുമെന്ന് വ്യക്തമായിരുന്നതാണ്. എന്നാല്‍, റിയോയിലെ അഭിമാനകരമായ പ്രകടനം കണക്കിലെടുത്ത് ദീപയുടെ പേര് അവസാനഘട്ടത്തില്‍ ചേര്‍ക്കുകയായിരുന്നു.
