ഭാര്യയും മക്കളും എഐഎഡിഎംകെയുടെ തെരഞ്ഞെടുപ്പ് പ്രചാരണത്തില്‍ പങ്കെടുക്കാന്‍ പോയതില്‍ മനംനൊന്ത് ഡിഎംകെ പ്രവര്‍ത്തകനായ ഭര്‍ത്താവ് ജീവനൊടുക്കി. പി രാമന്‍ എന്ന ഡിഎംകെ പ്രവര്‍ത്തകനാണ് വീട്ടില്‍ തൂങ്ങിമരിച്ചത്.
ഞായറാഴ്ച്ച നടന്ന ജയലളിതയുടെ ഒരു പൊതു പരിപാടിയില്‍ പങ്കെടുക്കുന്നതിന് രാമന്റെ നിര്‍ദേശം അവഗണിച്ച് ഭാര്യയും മക്കളും പോയിരുന്നു. തിങ്കളാഴ്‌ച ഡിഎംകെയുടെ പരിപാടിയില്‍ പങ്കെടുക്കുന്നതിനിടെ രാമനെ സ്വന്തം പാര്‍ട്ടിക്കാന്‍ ചോദ്യം ചെയ്യുകയും പരസ്യമായി പരിഹസിക്കുകയും ചെയ്‌തിരുന്നു. ഭാര്യയും മക്കളും എഐഎഡിഎംകെയുടെ ചടങ്ങില്‍ പങ്കെടുത്തതായിരുന്നു പ്രശ്‌നത്തിന് കാരണമായത്.
വൈകിട്ട് വീട്ടിലെത്തിയ രാമന്‍ മുറിയില്‍ കയറി അകത്തു നിന്നും കുറ്റിയിടുകയായിരുന്നു. രാവിലെ മുറി തുറക്കാത്തതിനെ തുടര്‍ന്ന് നടത്തിയ അന്വേഷണത്തിലാണ് രാമനെ തൂങ്ങിമരിച്ച നിലയില്‍ കണ്ടെത്തിയത്. സംഭവത്തില്‍ പൊലീസ് അന്വേഷണം ആരംഭിച്ചു.