പൂട്ടിയ കാറിനുള്ളിൽ കുടുങ്ങിയ സഹോദരങ്ങൾ ശ്വാസം ലഭിക്കാതെ മരിച്ചു
പൂട്ടിയിട്ട കാറില്‍ കുടുങ്ങി സഹോദരങ്ങള്‍ മരിച്ചു. ഡൽഹി പ്രാന്തത്തിലെ രൻഹോളയിലാണു സംഭവം. സോനു (5), രാജ് (6) എന്നിവരാണ് ശ്വാസം ലഭിക്കാതെ കാറിനുള്ളിൽപ്പെട്ട് മരിച്ചത്.
പിതാവ് രാജുവിന്‍റെ ഉടമസ്ഥതയിലുള്ള ടാക്സി കാറില്‍ കുടുങ്ങിയാണ് കുട്ടികള്‍ മരിച്ചത്. ബുധനാഴ്ച വൈകിട്ട് വീട്ടിലെത്തിയ രാജു കാര്‍ ലോക്ക് ചെയ്യാതെ വീട്ടില്‍ പ്രവേശിച്ചു. പിന്നീട് കാര്‍ ലോക്ക് ചെയ്‌തില്ലെന്ന് മനസിലാക്കി റിമോട്ട് കീ ഉപയോഗിച്ച് ദൂരെനിന്നു കാർ പൂട്ടുകയായിരുന്നു. ഈ സമയം കുട്ടികള്‍ കളിക്കാനായി കാറിനുള്ളിലുണ്ടായിരുന്നു.
ഏറെ വൈകിയിട്ടും കുട്ടികളെ കാണാതായതോടെ ബന്ധുക്കളും സുഹൃത്തുക്കളും ഇവര്‍ക്കായി തെരച്ചില്‍ നടത്തി. മണിക്കൂറുകളോളം കുട്ടികള്‍ക്കായി അന്വേഷണം നടത്തിയെങ്കിലും കുട്ടികളെ കണ്ടെത്താന്‍ സാധിച്ചില്ല. പിന്നീട് കുട്ടികളെ കാറിനുള്ളിൽ മരിച്ചനിലയിൽ കണ്ടെത്തുകയായിരുന്നു.
