മുന്‍ കേന്ദ്ര ടെലികോം മന്ത്രി കപില്‍ സിബലിന്റെ മകന്‍ അമിത് സിബല്‍ നല്‍കിയ മാനനഷ്ടക്കേസില്‍ ആംആദ്മി പാര്‍ട്ടി നേതാവ് ഷാസിയ ഇല്‍മിക്ക് അറസ്റ്റ് വാറന്‍റ്. കോടതിയില്‍ ഹാജരാകാത്തതിനെ തുടര്‍ന്നാണ് ഡല്‍ഹി കോടതി വാറന്‍റ് പുറപ്പെടുവിച്ചത്. ഉള്‍പ്പാര്‍ട്ടി ജനാധിപത്യമില്ലായെന്ന് ആരോപിച്ച് ഷാസിയ ഇല്‍മി ആംആദ്മി പാര്‍ട്ടി വിട്ടിരുന്നു. ഇത് സംബന്ധിച്ച് മാധ്യമങ്ങളെ ഇന്ന് ഷാസിയ കണ്ടിരുന്നു.
വോഡഫോണ്‍-ഹച്ചിസണ്‍ എന്നിവര്‍ക്കെതിരായ നികുതി കേസ് കോടതിക്ക് പുറത്ത് ഒത്തുതീര്‍പ്പാക്കാന്‍ മന്ത്രി കപില്‍ സിബല്‍ ഉറപ്പുനല്‍കിയതായി ആപ്പ് നേതാവ് അരവിന്ദ് കെജ്‌രിവാള്‍ ആരോപിച്ചിരുന്നു. ആരോപണം ഉന്നയിച്ച് നടത്തിയ വാര്‍ത്താസമ്മേളനത്തില്‍ സുപ്രീംകോടതി അഭിഭാഷകന്‍ പ്രശാന്ത് ഭൂഷണ്‍, ഷാസിയ ഇല്‍മി എന്നിവര്‍ പങ്കെടുക്കുകയും ചെയ്തു. കേസ് ഒത്തുതീര്‍പ്പാക്കുന്നത് വഴി 2000 കോടി രൂപയുടെ വിഹിതം കപില്‍ സിബലിന് ലഭിക്കുമെന്നും കെജ്‌രിവാള്‍ ആരോപണം ഉന്നയിച്ചിരുന്നു.
