ഉറങ്ങിക്കിടക്കുന്നവരുടെ മുടി മുറിക്കുന്ന ദുര്‍മന്ത്രവാദിനിയെന്നാരോപിച്ച് ദളിത് വൃദ്ധയെ തല്ലിക്കൊന്നു. ആഗ്രയിലാണ് ഇത്തരത്തില്‍ ഞെട്ടിച്ച സംഭവം അരങ്ങേറിയത്. ഉറങ്ങി കിടക്കുന്ന സ്ത്രീകളുടെ മുടി എഴുന്നേല്‍ക്കുമ്പോള്‍ മുറിച്ചു മാറ്റപ്പെട്ട രീതിയില്‍ കാണപ്പെടുന്നുവെന്ന വാര്‍ത്ത പ്രചരിച്ചിരുന്നു. ആഗ്രക്കു പുറമേ ദില്ലി, ഹരിയാന, ഉത്തര്‍പ്രദേശ്, രാജസ്ഥാന്‍ എന്നിവിടങ്ങളിലും മുടി മുറിക്കുന്ന സംഭവം റിപ്പോര്‍ട്ട് ചെയ്യപ്പെട്ടിരുന്നു.
മാന്‍ ദേവി എന്ന ദളിത് വൃദ്ധയാണ് ഈ ക്രൂരതയ്ക്ക് ഇരയായത്. ബംഗേല്‍ സമുദായത്തില്‍ പെട്ടവരാണ് ഈ കൊലപാതകത്തിന് പിന്നിലെന്ന് റിപ്പോര്‍ട്ടുകളുണ്ട്. വ്യാഴാഴ്ച പുലര്‍ച്ചേ നാലുമണിയോടെയാണ് സംഭവം നടന്നത്. വഴിതെറ്റി സവര്‍ണ വിഭാഗം താമസിക്കുന്ന പ്രദേശത്ത് വന്നതാണെന്നും താന്‍ മന്ത്രവാദിയല്ലെന്നും കാലില്‍ വീണു പറഞ്ഞിട്ടു പോലും ജനകൂട്ടം മാന്‍ ദേവിയെ മര്‍ദ്ദിച്ചു കൊലപ്പെടുത്തുകയായിരുന്നുവെന്നും മരുമകള്‍ പറഞ്ഞതായി എന്‍ഡിടിവി റിപ്പോര്‍ട്ട് ചെയ്തിരുന്നു.
