2004 നവംബര് 10നാണ് രഞ്ജിത് സംവിധാനം ചെയ്ത ‘ബ്ലാക്ക്’ റിലീസായത്. കാരിക്കാമുറി ഷണ്മുഖന് എന്ന കഥാപാത്രമായി മമ്മൂട്ടി തകര്‍ത്തഭിനയിച്ച സിനിമ. അമല്‍ നീരദായിരുന്നു ചിത്രത്തിന്‍റെ ഛായാഗ്രഹണം. ഡെവിന്‍ കാര്‍ലോസ് പടവീടന്‍ എന്ന വില്ലന്‍ കഥാപാത്രമായി ലാല്‍ മിന്നിത്തിളങ്ങി. ലാല്‍ തന്നെയായിരുന്നു ചിത്രത്തിന്‍റെ നിര്‍മ്മാണം.
തമ്പുരാന്‍ സിനിമകളിലൂടെയും അമാനുഷ കഥാപാത്രങ്ങളിലൂടെയും മലയാള സിനിമയുടെ പൊന്നിന്‍‌വിലയുള്ള തിരക്കഥാകൃത്തും സംവിധായകനുമായി മാറിയ രഞ്ജിത് റിയലിസ്റ്റിക് സിനിമകളിലേക്കുള്ള ചുവടുമാറ്റത്തിന്‍റെ തുടക്കമായിരുന്നു ബ്ലാക്ക്. ഷണ്മുഖന് എന്ന കഥാപാത്രത്തില്‍ ഹീറോയിസത്തേക്കാള്‍ കൂടുതല്‍ ഒരു നിസഹായനായ മനുഷ്യന്‍റെ പ്രതികരണങ്ങളാണ് കാണാന്‍ കഴിയുന്നത്.
