മിസോറാം ഗവർണറും മുതിർന്ന ബിജെപി നേതാവുമായ കുമ്മനം രാജശേഖരൻ വരുന്ന ലോക്സഭാ തെരഞ്ഞെടുപ്പിൽ തിരുവനന്തപുരത്ത് മത്സരിക്കണമെന്ന് ഒ രാജഗോപാൽ എംഎൽഎ. അനന്തപുരിയിൽ അങ്കം കുറിക്കാൻ കുമ്മനം രാജശേഖരൻ വരുമോ എന്ന് ചോദ്യമുയർത്തിയാൽ, വരും വരാതിരിക്കില്ല എന്നാണ് ബിജെപി പറയുന്നത്. അവരുടെ ആഗ്രഹവും അതുതന്നെ.
കുമ്മനം രാജശേഖരനെ കേരളത്തിലേക്ക് മടക്കിക്കൊണ്ട് വരണമെന്ന് കേന്ദ്ര നേതൃത്വത്തോട് ആവശ്യപ്പെടുമെന്നും ഒ രാജഗോപാൽ പറയുന്നു. കുമ്മനം ഗവർണർ പദവിയിൽ തുടരുന്നത് കൂട്ടിലിട്ട കിളിയെ പോലെയാണ്. ഗവർണർ സ്ഥാനത്ത് തുടരാൻ അദ്ദേഹത്തിന് ആഗ്രഹമില്ലെന്നും അദ്ദേഹത്തെ കേരളത്തിലേക്ക് തന്നെ തിരിച്ച് കൊണ്ടുവരണമെന്നുമാണ് രാജാഗോപാൽ അടക്കമുള്ളവർ പറയുന്നത്. എന്നാൽ, ശശി തരൂരിനോടു കൊമ്പുകോർക്കാൻ കുമ്മനത്തിന് കഴിയുമോ എന്ന് ചിന്തിക്കുന്നവരും ഉണ്ട്.
