കെഎസ്ആർടിസി ജീവനക്കാരുടെ പണിമുടക്ക് ഇന്നു രാത്രി 12ന് ആരംഭിക്കും. സർക്കാർ ഉറപ്പിനു വിരുദ്ധമായി ക്ഷാമബത്ത കുടിശിക വിതരണം നിർത്തിവച്ചതിലും പെൻഷനും ശമ്പളവും അനിശ്ചിതമായി വൈകുന്നതിലും പ്രതിഷേധിച്ചാണു സമരം. സിഐടിയു ഒഴികെയുള്ള നാലു തൊഴിലാളി സംഘടനകളാണ് പണിമുടക്കുന്നത്. എന്നാല്‍ ഈ സമരം ശബരിമല സർവീസുകളെ ബാധിക്കില്ലെന്നും സംഘടനകൾ അറിയിച്ചു.
അതേസമയം, സമരം പിൻവലിക്കണമെന്നാവശ്യപ്പെട്ടു ഗതാഗത മന്ത്രി ഇന്നു രാവിലെ മാനേജ്മെന്റിന്റെയും സംഘടനാ പ്രതിനിധികളുടെയും യോഗം വിളിച്ചിട്ടുണ്ട്. ശമ്പളമോ ക്ഷാമബത്തയോ മറ്റ് ആനുകൂല്യങ്ങളോ വെട്ടിക്കുറയ്ക്കില്ലെന്നും ക്ഷാമബത്ത ഉടൻ നൽകാനുള്ള നടപടികള്‍ കൈക്കൊള്ളുമെന്നും സർവീസ് മുടക്കിയുള്ള ഈ സമരം കെഎസ്ആർടിസിക്കു താങ്ങാനാകില്ലെന്നും മന്ത്രി വ്യക്തമാക്കി
