കേരളത്തില്‍ ഇപ്പോള്‍ നടക്കുന്നത് കേന്ദ്രത്തില്‍ നടക്കുന്ന മാവോ വേട്ടയുടെ തുടര്‍ച്ചയാണ്. മാവോവാദികളെ ജനാധിപത്യ ക്രമത്തിലേക്ക് തിരികെ കൊണ്ടുവരികയാണ് വേണ്ടത്. അല്ലാതെ വെടിവച്ചു കൊല്ലുകയല്ല. രാഷ്ട്രീയ അഭിപ്രായ വ്യത്യാസങ്ങളെ വെടിയുണ്ടകള്‍ കൊണ്ടല്ല നേരിടേണ്ടത്. അങ്ങനെ നേരിട്ടിരുന്നു എങ്കില്‍ രാജ്യത്ത് കമ്യൂണിസ്റ്റുകാര്‍ തന്നെ ഉണ്ടാകുമായിരുന്നില്ല - കാനം രാജേന്ദ്രന്‍ പറഞ്ഞു.
പുസ്തകങ്ങള്‍ സൂക്ഷിച്ചാല്‍ എങ്ങനെയാണ് അത് കുറ്റകരമാകുന്നത്? ലൈബ്രറികളില്‍ രാമായണവും മഹാഭാരതവും മാത്രം മതിയോ? രണ്ട് സിം കാര്‍ഡുകളുള്ള ഫോണ്‍ മാരകായുധമല്ല. യു എ പി എ ചുമത്തിയ വിദ്യാര്‍ത്ഥികള്‍ക്കെതിരെ പൊലീസ് തെളിവുകള്‍ ചമയ്ക്കുകയാണ്. ഇത്തരം നീക്കങ്ങള്‍ ചെറുക്കപ്പെടേണ്ടതാണ്. ഇതുപോലെയുള്ള കരിനിയമങ്ങള്‍ ഇടതുപാര്‍ട്ടികളുടെ നേതൃത്വത്തിലുള്ള സര്‍ക്കാരുകള്‍ നടപ്പിലാക്കാന്‍ പാടില്ല - കാനം നിര്‍ദ്ദേശിച്ചു.
