കര്‍ണാടകയിലെ ഐഎസ്-ഐപിഎസ് പോരില്‍ ഉദ്യോഗസ്ഥര്‍ക്കെതിരെ നടപടി. ഡി.രൂപ ഐപിഎസിനെയും രോഹിണി സിന്ധൂരി ഐഎഎസിനെയും സ്ഥലംമാറ്റി. ഇരുവര്‍ക്കും പുതിയ ചുമതലയില്ല. നിലവില്‍ കരകൗശല വികസന കോര്‍പറേഷന്‍ എംഡിയാണ് രൂപ. ദേവസ്വം കമ്മിഷണറാണ് രോഹിണി സിന്ധൂരി. രൂപയുടെ ഭര്‍ത്താവും ഐഎഎസ് ഉദ്യോഗസ്ഥനുമായ മുനീഷ് മൗദ്ഗിലിനെയും സ്ഥലം മാറ്റിയിട്ടുണ്ട്.
രൂപയെയും രോഹിണിയെയും പരസ്യപ്രതികരണം നടത്തുന്നതില്‍ നിന്ന് ഇന്നലെ ചീഫ് സെക്രട്ടറി വിലക്കിയിരുന്നു. മന്ത്രിസഭാ യോഗത്തിലെ ചര്‍ച്ചയ്ക്ക് ശേഷമാണ് നടപടി. ഇരുവര്‍ക്കുമെതിരെ വകുപ്പുതല നടപടിയുണ്ടാകുമെന്ന് ആഭ്യന്തരമന്ത്രി അറിയിച്ചിരുന്നു. ഞായറാഴ്ച ഡി.രൂപ രോഹിണിയുടെ സ്വകാര്യ ചിത്രങ്ങള്‍ സാമൂഹിക മാധ്യമത്തില്‍ പങ്കുവെച്ചതോടെയാണ് പ്രശ്‌നങ്ങളുടെ തുടക്കം.