വോട്ടോ? അതിന് വേറെ ആളെ നോക്കണം, വോട്ട് ചെയ്തിട്ടെന്തുകിട്ടാനാ... വോട്ടിനെക്കുറിച്ച് ചോദിച്ചാൽ യുവ തലമുറകളുടെ മറുപടിയാണിത്. ഇത് മാറേണ്ടത് കാലത്തിന്റെ ആവശ്യമാണെന്ന് മനസ്സിലാക്കിയ കാസർഗോഡ് ജില്ലാ തെരഞ്ഞെടുപ്പ് വിഭാഗം വോട്ട് ചെയ്യാൻ മടിക്കുന്ന യുവതലമുറയെ ബോധവ‌ൽക്കരിക്കാൻ ഷോർട്ട് ഫിലിമൊരുക്കി രംഗത്ത്.
തെരഞ്ഞെടുപ്പിന്റെ പ്രാധാന്യം മനസ്സിലാക്കാതെ പരിഹാസത്തോടെ മാത്രം കാണുന്ന യുവതലമുറയെ കഴിഞ്ഞ തലമുറയിലെ മുതിർന്നവർ ബോധവ‌ൽക്കരിക്കുന്ന രീതിയിലുള്ള ഹ്രസ്വ ചിത്രമാണ് ഒരുക്കിയിരിക്കുന്നത്. അവരുടെ വാക്കുകളിലൂടെ ജനാധിപത്യത്തിന്റെ പ്രാധാന്യം മനസ്സിലാക്കുന്ന ചെറുപ്പക്കാർ വോട്ട് ചെയ്യുന്നതാണ് ചിത്രത്തിലെ ഉള്ളടക്കം.
