സിസ്റ്റര്‍ അഭയയുടെ ആന്തരിക പരിശോധനാ ഫലം രേഖപ്പെടുത്തിയ വര്‍ക്ക് രജിസ്റ്ററില്‍ കൃത്രിമം കാട്ടിയെന്ന പരാതിയില്‍ പ്രതികളുടെ മൊഴി വീണ്ടും രേഖപ്പെടുത്തി. കേസ് സംബന്ധമായ രേഖകള്‍ വീണ്ടും പരിശോധിക്കണമെന്ന് തിരുവനന്തപുരം സിജെഎം കോടതി വ്യക്തമാക്കി. പ്രധാന തെളിവുകള്‍ പലതും പ്രതിഭാഗം തന്നെ സമര്‍പ്പിച്ചതാണെന്ന് ചൂണ്ടിക്കാട്ടിയ കോടതി ഇക്കാരണത്താല്‍ പ്രതികളോട് വീണ്ടും വിശദീകരണം തേടേണ്ടതുണ്ടെന്നും വ്യക്തമാക്കി.
എന്നാല് രേഖകള്‍ ഹാജരാക്കാന്‍ പ്രതിഭാഗം സമയം ആവശ്യപ്പെട്ടതിനെ തുടര്ന്ന് കേസ് പരിഗണിക്കുന്നത് 20 ലേക്ക് മാറ്റി. ശരിയായ രേഖകളാണ് നല്കിയതെന്ന് ഒന്നാം പ്രതി ഗീത കോടതിയില്‍ പറഞ്ഞു. ചീഫ് കെമിക്കല്‍ എക്‌സാമിനര്‍ ലാബിലെ ജോയിന്റ് കെമിക്കല്‍ എക്‌സാമിനറായിരുന്ന ആര്‍ ഗീത ഒന്നാം പ്രതിയും അനലിസ്റ്റ് ചിത്ര രണ്ടാം പ്രതിയുമായ കേസിന്റെ വിചാരണ ഒക്ടോബര് ഒന്നിന് പൂര്‍ത്തിയായിരുന്നു.
