വെള്ളറട: പനി കുറയ്ക്കാനുള്ള കുത്തിവയ്പ്പ് സ്വീകരിച്ചതിനെ തുടര്‍ന്ന് കുഴഞ്ഞുവീണ യുവാവ് ചികിത്സയിലിരിക്കെ മരിച്ചു. പനച്ചമൂട് സ്വദേശി അരുണ്‍ കൃഷ്ണ (42) തിങ്കളാഴ്ച തിരുവനന്തപുരത്തെ സ്വകാര്യ മെഡിക്കല്‍ കോളേജ് ആശുപത്രിയില്‍ മരിച്ചു. കടുത്ത പനി ബാധിച്ച അരുണ്‍ ശനിയാഴ്ച വൈകുന്നേരം സ്വന്തമായി ബൈക്ക് ഓടിച്ചാണ് പനച്ചമൂട്ടിലെ ആശുപത്രിയിലെത്തിയത്. ഡോക്ടറുടെ നിര്‍ദ്ദേശപ്രകാരം അദ്ദേഹത്തിന് ഒരു കുത്തിവയ്പ്പ് നല്‍കി. കുത്തിവയ്പ്പ് സ്വീകരിച്ച ഉടന്‍ തന്നെ അരുണ്‍ നിലത്ത് വീണു.
തുടര്‍ന്ന് ആശുപത്രി അധികൃതര്‍ അദ്ദേഹത്തെ ആംബുലന്‍സില്‍ ഒരു സ്വകാര്യ മെഡിക്കല്‍ കോളേജ് ആശുപത്രിയിലേക്ക് കൊണ്ടുപോകുകയും കുടുംബത്തെ അറിയിക്കുകയും ചെയ്തു. പ്രവാസിയായ അരുണ്‍ നാല് ദിവസം മുമ്പാണ് മകന് സുഖമില്ലെന്ന് കാണിച്ച് ഏഴ് ദിവസത്തെ അവധിയില്‍ നാട്ടിലേക്ക് മടങ്ങിവന്നത്.ബന്ധുക്കളുടെ പരാതിയെ തുടര്‍ന്ന് വെള്ളറട പോലീസ് സ്വകാര്യ ആശുപത്രിക്കെതിരെ കേസെടുത്തു. ആശുപത്രി തമിഴ്നാട്ടിലായതിനാല്‍ അരുമന പോലീസിനെയും വിവരമറിയിച്ചിട്ടുണ്ട്.
ആന്തരിക അവയവങ്ങളുടെ റിപ്പോര്‍ട്ടുകള്‍ വന്നാല്‍ മാത്രമേ മരണകാരണം വ്യക്തമാകൂ എന്ന് പോലീസ് പറഞ്ഞു. അരുണിന്റെ ഭാര്യ ആശ സംഭവം നടന്ന അതേ സ്വകാര്യ ആശുപത്രിയിലാണ് ജോലി ചെയ്യുന്നത്. മക്കള്‍: അശ്വിന്‍ കൃഷ്ണ, ആകാശ് കൃഷ്ണ. മൃതദേഹം ഇന്ന് രാവിലെ 11 മണിക്ക് വീട്ടുവളപ്പില്‍ സംസ്‌കരിക്കും.
