മലയാളത്തിലെ പ്രശസ്ത ഗായികയെ തട്ടികൊണ്ടുപോകാന്‍ ശ്രമം. കഴിഞ്ഞ ദിവ്വസം രാത്രി ഗാനമേള കഴിഞ്ഞു സഹപ്രവര്‍ത്തകരോടൊപ്പം മടങ്ങുന്ന വേളയില്‍ കൂടെയുള്ളവര്‍ ചായ കുടിയ്ക്കാന്‍ കയറിയ സമയം നോക്കിയാണ് ഗായികയെ തട്ടികൊണ്ടുപോകാന്‍ ശ്രമം നടന്നത്. സംഭവവുമായി ബന്ധപ്പെട്ട് നെടുമ്പന പഞ്ചായത്ത് ഓഫീസിന് സമീപം തെക്കേ ചരുവിള വീട്ടില്‍ മനാഫൂദ്ദീനെ പൊലീസ് അറസ്റ്റ് ചെയ്തു.
ഷാഡോ പൊലീസാണെന്ന് സ്വയം പരിചയപ്പെടുത്തിയ ശേഷം മനാഫുദ്ദീന്‍, കാറിലിരുന്ന് മദ്യപിക്കുന്നത് സിസിടിവിയില്‍ പതിഞ്ഞിട്ടുണ്ടെന്ന് ഗായികയോട് പറയുകയും തുടര്‍ന്ന് കാറില്‍ കയറുകയുമായിരുന്നു. ഗായികയെ ബലമായി കടന്നുപിടിച്ച് ഇയാള്‍ പുറത്തേക്ക് വലിച്ചിറക്കാന്‍ ശ്രമിച്ചു. ഗായിക ബഹളം വെച്ചതോടെയാണ് മനാഫുദ്ദീനെ നാട്ടുകാര്‍ പിടികൂടി പൊലീസിന് കൈമാറിയത്.
നാട്ടുകാര്‍ വിവരം പൊലീസില്‍ അറിയിച്ചതോടെ കൊട്ടിയം എസ് ഐ ആര്‍ രതീഷ്, ജൂനിയര്‍ എസ് ഐ സുരേഷ് ബാബു എന്നിവരെത്തി ഇയാളെ കസ്റ്റഡിയിലെടുത്തു. സംഭവത്തിനിടെ മനാഫുദ്ദീനെ ചിലര്‍ കൈയ്യേറ്റം ചെയ്തിരുന്നു. നിസാരമായി പരുക്ക് പറ്റിയതിനാല്‍ ആശുപത്രിയിലെത്തിച്ച് ചികിത്സ നല്‍കിയതിനു ശേഷമാണ് മനാഫൂദ്ദീനെ സ്റ്റേഷനിലേക്ക് മാറ്റിയത്.
