കാമുകിയുടെ നഗ്നത പ്രചരിപ്പിക്കുമെന്ന്‌ ഭീഷണിപ്പെടുത്തി പണം ആവശ്യപ്പെട്ടു; യുവാവ്‌ പിടിയില്‍
ശനി, 4 മെയ് 2013 (14:43 IST)
PRO
PRO
കാമുകിയുടെ നഗ്നത മൊബൈലില്‍ പകര്‍ത്തിയ ശേഷം പണം ആവശ്യപ്പെട്ട യുവാവിനെ പൊലീസ് അറസ്റ്റു ചെയ്തു . അകലാട്‌ ഖലീഫ കോളനിയില്‍ കറുത്താരന്‍ അലി(38)യെയാണ്‌ ചാവക്കാട്‌ പൊലീസ് അറസ്റ്റു ചെയ്തത്‌.
രണ്ടു ഭാര്യമാരില്‍ അഞ്ചു മക്കളുള്ള അലി രണ്ടാം ഭാര്യയും മക്കളുമായി ഖലീഫ കോളനിയിലാണ് താമസിക്കുന്നത്‌. ഒരു വര്‍ഷം മുമ്പ്‌ കോളനിയിലെ സമീപ താമസകാരിയും മൂന്നു മക്കളുടെ മാതാവുമായ സ്ത്രീയുമായി അലി അടുപ്പത്തിലായി. യുവതിയുടെ ഭര്‍ത്താവ്‌ ഇവരുടെ അവിഹിതബന്ധം അറിഞ്ഞതോടെ യുവതിയെ ഉപേക്ഷിച്ചു. യുവതിയും മക്കളും ഒറ്റക്കായിരുന്നു താമസം. അലി ഈ വീട്ടിലെ നിത്യസന്ദര്‍ശകനായി. പലപ്പോഴായി യുവതിയുടെ നഗ്നത മൊബെയില്‍ ഫോണില്‍ പകര്‍ത്തി. കഴിഞ്ഞ ദിവസമാണ്‌ യുവാവ്‌ മൊബൈല്‍ ചിത്രങ്ങള്‍ കാണിച്ച്‌ യുവതിയെ ശല്യം ചെയ്യാന്‍ തുടങ്ങിയത്‌. ഒന്നരലക്ഷം രൂപയാണ്‌ ആവശ്യപ്പെട്ടത്.
പണംകൊടുത്തില്ലെങ്കില്‍ ചിത്രങ്ങള്‍ പ്രചരിപ്പിക്കുമെന്നും മറ്റും പറഞ്ഞായിരുന്നു ഭീഷണി. സഹികെട്ട യുവതി സിഐക്ക്‌ പരാതി കൊടുക്കുകയായിരുന്നു. തുടര്‍ന്നാണ്‌ യുവതിയെ തന്നെ ഉപയോഗിച്ചു പൈസതരാമെന്ന് പറഞ്ഞ് യുവാവിനെ ഗുരുവായൂരിലേക്കു വിളിപ്പിച്ചത്‌. ഇന്നലെ രാവിലെ യുവതിയെ തേടിയെത്തിയ യുവാവിനെ പൊലീസ് സംഘമാണ്‌ എതിരേറ്റത്‌. സ്റ്റേഷനില്‍ കൊണ്ടുവന്ന യുവാവിനെ ചോദ്യം ചെയ്തു മൊബൈല്‍ഫോണ്‍ കസ്റ്റഡിലെടുത്തു. പ്രതിയെ കോടതിയില്‍ ഹാജരാക്കി.
