കാടും മേടും താണ്ടി കാടിന്റെ മക്കളുടെ ഹൃദയം തൊട്ടറിഞ്ഞ്‌ ഇടുക്കി പാര്‍ലമെന്റ്‌ മണ്ഡലം ബിജെപി സ്ഥാനാര്‍ത്ഥി അഡ്വ. സാബു വര്‍ഗീസ്‌ കുട്ടമ്പുഴ പഞ്ചായത്തില്‍ സന്ദര്‍ശനം നടത്തി. ആദിവാസി മേഖലയായ കണ്ടന്‍ പാറയില്‍ നിന്ന്‌ ഉരുളന്‍തണ്ണിയിലേക്ക്‌ മാറ്റി പാര്‍പ്പിച്ച 65ഓളം വീടുകളില്‍ സന്ദര്‍ശനം നടത്തിയ പുനരധിവാസ പദ്ധതികള്‍ പൂര്‍ണ്ണമായും സര്‍ക്കാര്‍ നടപ്പിലാക്കാത്തതിന്റെ ആവലാതികള്‍ കേട്ട്‌ അവരെ ആസ്വസിപ്പിച്ച്‌ ഉച്ചയോടെയാണ്‌ അദ്ദേഹം കാടിറങ്ങിയത്‌.
രാവിലെ കുട്ടമ്പുഴ പഞ്ചായത്തിലെ വടാട്ടുപാറ, കുട്ടമ്പുഴ എന്നി സ്ഥലങ്ങളിലും ഉച്ചയ്ക്ക്‌ ശേഷം നേര്യമംഗലം, നെല്ലിമറ്റം, വാരപ്പെട്ടി, തൃക്കാരിയൂര്‍, മുത്തംക്കുഴി, ചേറങ്ങനാല്‍, മാതിരപ്പിള്ളി, കറുകടം എന്നിവിടങ്ങളില്‍ റോഡ്‌ ഷോയും നടന്നു. ഇന്ന് രാവിലെ മൂവാറ്റുപുഴ മണ്ഡലത്തിലായിരുന്നു സാബു വര്‍ഗീസിന്റെ പര്യടനം. രാവിലെ 8.30ന്‌ മൂവാറ്റുപുഴ താലൂക്കിലെ പൈങ്ങട്ടൂര്‍ പഞ്ചായത്തിലെ കടവൂരില്‍ നിന്ന്‌ പര്യടനം ആരംഭിച്ചു. ബിജെപി ഇടുക്കി ജില്ല പ്രസിഡന്റ്‌ പി.എ. വേലുക്കുട്ടന്‍ പര്യടനപരിപാടി ഉദ്ഘാടനം ചെയ്തു.
തുടര്‍ന്ന്‌ പോത്താനിക്കാട്‌, ആയവന, കല്ലൂര്‍ക്കാട്‌, മഞ്ഞള്ളൂര്‍, ആവോലി, ആരക്കുഴ, പാലക്കുഴ, മാറാടി, വാളകം, പായിപ്ര എന്നി പഞ്ചായത്തുകളിലും മൂവാറ്റുപുഴ മുനിസിപ്പല്‍ പ്രദേശത്തും വിവിധ കേന്ദ്രങ്ങളില്‍ സ്ഥാനാര്‍ത്ഥി പര്യടനം നടത്തി സ്വീകരണങ്ങള്‍ ഏറ്റുവാങ്ങി.
