കുപ്രസിദ്ധ കുറ്റവാളി ആട് ആന്‍റണിയെ ജൂണ്‍ 20ന് മുമ്പ് പിടികൂടണമെന്ന് പൊലീസിന് ആഭ്യന്തരമന്ത്രി രമേശ് ചെന്നിത്തലയുടെ അന്ത്യശാസനം. രണ്ടുവര്‍ഷമായി ശ്രമിച്ചിട്ടും ആട് ആന്‍റണിയെ പിടികൂടാന്‍ കഴിയാത്തത് അങ്ങേയറ്റത്തെ നാണക്കേടായാണ് ആഭ്യന്തരവകുപ്പ് വിലയിരുത്തുന്നത്. ഡ്യൂട്ടിക്കിടെ മണിയന്പിള്ള എന്ന പൊലീസുകാരനെ കൊലപ്പെടുത്തിയ കേസിലാണ് പ്രധാനമായും ആട് ആന്‍റണിയെ തിരയുന്നത്.
2012 ജൂണ്‍ 26ന് കൊല്ലം ജില്ലയിലെ പാരിപ്പള്ളിയില്‍ പട്രോളിങ് ഡ്യൂട്ടിയിലുണ്ടായിരുന്ന മണിയന്പിള്ള എന്ന പൊലീസുകാരനെ കുത്തിക്കൊലപ്പെടുത്തിയ കേസിലാണ് വര്‍ഗീസ് ആന്‍റണി എന്ന ആട് ആന്‍റണിയെ തിരയുന്നത്. ഓയൂരിലെ ഒരു വീട്ടില്‍ മോഷണം നടത്തി തമിഴ്നാട് രജിസ്ട്രേഷനിലുള്ള വാനില്‍ ആട് ആന്‍റണി തിരുവനന്തപുരം ഭാഗത്തേക്ക് വരുമ്പോള്‍ പാരിപ്പള്ളിക്ക് സമീപം പട്രോളിങ് സംഘം സംശയം തോന്നി തടയുകയായിരുന്നു. തുടര്‍ന്നാണ് മണിയന്‍പിള്ളയെ കുത്തിക്കൊലപ്പെടുത്തിയ ശേഷം ആന്‍റണി രക്ഷപ്പെട്ടത്.
