വെള്ളിയാഴ്ച രാത്രി പത്തുമണിയോടെയായിരുന്നു എറണാകുളം, കോട്ടയം, ഇടുക്കി, പാലക്കാട്, കോഴിക്കോട് ജില്ലകളില്‍ ആകാശത്ത് അഗ്‌നിഗോളം പ്രത്യക്ഷപ്പെട്ടത്. കണ്ണഞ്ചിപ്പിക്കുന്ന പ്രകാശം ചൊരിഞ്ഞു പോയ തീഗോളം വളരെ താഴ്ന്നായിരുന്നു പറന്നതെന്ന് ദൃക്‌സാക്ഷികള്‍ പറഞ്ഞു. ഉല്‍ക്കാ പതനമാണ് ഉണ്ടായതെന്നാണ് അധികൃതര്‍ പറയുന്നത്.
കരുമാല്ലൂരില്‍ തീപ്പിടിത്തമുണ്ടായ സ്ഥലത്തിന് സമീപത്തെ ആളുകള്‍ തീഗോളം വരുന്നത് കണ്ടിരുന്നു. തീഗോളം കണ്ടതിന് പിന്നാലെ പറമ്പ് കത്തുന്നതാണ് അവര്‍ കണ്ടത്. വെള്ളമൊഴിച്ച് തീകെടുത്താന്‍ ശ്രമിച്ചു. എന്നാല്‍, ഉല്‍ക്കാപതനം പോലുള്ള എന്തെങ്കിലും കൊണ്ടാണ് തീപിടുത്തം ഉണ്ടായതെന്ന് ആരും അറിഞ്ഞിരുന്നില്ല.
