ലങ്കയില്‍ തമിഴ് വംശജര്‍ ഒരുമിച്ച് പാര്‍ട്ടിയുണ്ടാക്കി; സ്വപ്നങ്ങള്‍ തിരിച്ച് പിടിക്കാന്‍
വ്യാഴം, 25 ജൂലൈ 2013 (11:05 IST)
PTI
പിച്ചിചീന്തീയ ഒരായിരം സ്വപ്നങ്ങള്‍ ഒരിക്കലെങ്കിലും കൈവരുവാന്‍ ശ്രീലങ്കന്‍ ജനങ്ങള്‍ തെരഞ്ഞെടുപ്പില്‍ മത്സരിക്കാന്‍ പുതിയ പാര്‍ട്ടികള്‍ രൂപികരിച്ചു. നീണ്ട 29 വര്‍ഷത്തെ മനുഷ്യക്കുരുതികള്‍ക്ക് ശേഷം ഇത്തവണയെങ്കിലും തങ്ങള്‍ക്ക് നീതി കിട്ടുമോ എന്നാണ് പാര്‍ട്ടി രൂപികരണത്തിലൂടെ തമിഴ് വംശജര്‍ ചിന്തിക്കുന്നത്.
എല്‍ടിടിയെ പൂര്‍ണമായും തച്ചുതകര്‍ത്ത സിംഹള മേല്‍ക്കോയ്മയെ ശക്തമായി പ്രഹരിക്കുവാന്‍ തന്നെയാണ് ഈ പാര്‍ട്ടി രൂപികരണം എന്ന് കരുതുന്നു. സെപ്റ്റംബര്‍ അവസാനം നടക്കുന്ന പ്രവിശ്യാ സമിതി തെരഞ്ഞെടുപ്പില്‍ മത്സരിക്കാനാണ് പാര്‍ട്ടികള്‍ രൂപികരിച്ചിരിക്കുന്നത്.
PTI
അപ്കണ്‍ട്രി പീപ്പിള്‍സ്‌ ഫ്രണ്ട്‌ (യുപിഎഫ്‌) നേതൃത്വത്തിലുള്ള സഖ്യത്തിലെ മറ്റു കക്ഷികള്‍ ഡമോക്രാറ്റിക്‌ വര്‍ക്കേഴ്സ്‌ കോണ്‍ഗ്രസ്‌, വര്‍ക്കേഴ്സ്‌ ലിബറേഷന്‍ ഫ്രണ്ട്‌, ഡമോക്രാറ്റിക്‌ ലെഫ്റ്റ്‌ ഫ്രണ്ട്‌ എന്നിവയാണ്‌ തമിഴ് ജനങ്ങള്‍ രൂപികരിച്ച പുതിയ പാര്‍ട്ടികള്‍.
സഖ്യത്തിലൂടെ പ്രവിശ്യാ സമിതിയില്‍ കൂടുതല്‍ സീറ്റുകള്‍ നേടാനാവുമെന്നു പാര്‍ലമെന്റ്‌ അംഗം പി. രാധാകൃഷ്ണന്‍ പറഞ്ഞു. ഇതേസമയം, എല്‍ടിടിഇയുടെ പ്രധാന വിമര്‍ശകനും തുള്‍ഫ്‌ പാര്‍ട്ടി അംഗവുമായ വീരസിംഹം ആനന്ദ സംഗാരി, പ്രവിശ്യാ തെരഞ്ഞെടുപ്പില്‍ പ്രധാന തമിഴ് പാര്‍ട്ടിയായ ടിഎന്‍എയുമായി കൈകോര്‍ത്തു.
ഭിന്നതകള്‍ മറക്കുകയും ഐക്യത്തോടെ നില്‍ക്കുകയും ചെയ്യേണ്ട സമയമാണ്‌ ഇതെന്ന്‌ അദ്ദേഹം പറഞ്ഞു. തങ്ങള്‍ക്ക് വിജയിക്കാന്‍ സാധിക്കുമെന്നതില്‍ സംശയമില്ലയെന്നും അദ്ദേഹം കൂട്ടിച്ചേര്‍ത്തു.
