അന്താരാഷ്ട്ര തലത്തില്‍ മാധ്യമ ശ്രദ്ധ നേടിയ ചാര സുന്ദരി, അന്ന ചാപ്മാന്റെ പാവകള്‍ക്കും യുഎസ് വിപണിയില്‍ വന്‍ ഡിമാന്റ്. ‘ഹീറോബില്‍ഡേഴ്സ് ഡോട്ട് കോമാണ് ചാര സുന്ദരിയുടെ രൂപം വിറ്റഴിച്ച് ലാഭം കൊയ്യുന്നത്.
അന്ന ചാപ്മാന്‍ തന്റെ കഥ വെളിപ്പെടുത്താന്‍ മാധ്യമങ്ങളില്‍ നിന്ന് വന്‍ തുക ആവശ്യപ്പെട്ടതും അന്നയെ ഒരു പ്രമുഖ അഡല്‍റ്റ് സിനിമ കമ്പനി അഭിനയിക്കാന്‍ ക്ഷണിച്ചതും വാര്‍ത്തയായതിനു പിന്നാലെയാണ് അന്ന ചാപ്മാന്‍ പാവകളും ശ്രദ്ധിക്കപ്പെടുന്നത്. റഷ്യന്‍ ചാരസുന്ദരിയുടെ രണ്ട് തരം പാവകളാണ് വില്‍പ്പനയ്ക്ക് എത്തുന്നത്.
ജീന്‍സും ടോപ്പും ധരിച്ച “ദ പ്രെഡേറ്റര്‍“ ശ്രേണിയിലുള്ളതും ചെറിയ സ്കര്‍ട്ട് മാത്രം ധരിച്ച് നില്‍ക്കുന്ന “ദ സ്പൈ ഐ കുഡ് ലവ്” ശ്രേണിയിലുള്ളതുമായ ചാപ്മാന്‍ പാവകളെയാണ് വാങ്ങാന്‍ ലഭിക്കുക. ആദ്യ ശ്രേണിയിലുള്ള പാവകള്‍ക്ക് ശക്തമായ മസിലുകള്‍ ഉണ്ടെങ്കില്‍ രണ്ടാം ശ്രേണിയിലുള്ള ‘ചൂടന്‍’ പാവയുടെ അരയ്ക്ക് മുകള്‍ ഭാഗത്ത് ഒരു തോക്കിന്റെ മറവ് മാത്രമേ ഉള്ളൂ! പാവയ്ക്ക് ഒന്നിന് 29.95 ഡോളറാണ് വില.
ബരാക്ക് ഒബാമ, ബെര്‍നി മഡോഫ്, സാറ പാലിന്‍ തുടങ്ങിയ പ്രശസ്തരുടെ പാവകള്‍ക്കൊപ്പമാണ് അന്ന ചാപ്മാന്റെ പാവയും വിറ്റഴിക്കുന്നത്. ഇപ്പോള്‍ ഏറ്റവും കൂടുതല്‍ വിറ്റഴിക്കുന്നത് പാലിന്റെ പ്രതിരൂപമാണെങ്കിലും ഇതിന് ചാപ്മാന്‍ ഉടന്‍ തന്നെ വെല്ലുവിളി ഉയര്‍ത്തുമെന്നാണ് നിര്‍മ്മാതാക്കള്‍ കരുതുന്നത്.
