അമല്‍ നീരദിന്‍റെ സിനിമകളുടെ പ്രത്യേകത ആ സിനിമകള്‍ അതിഗംഭീരമായി നമ്മുടെ മുന്‍‌വിധികളെ ഞെരിച്ചുപൊടിച്ചുകളയുന്നു എന്നതാണ്. ബിഗ്ബി പ്രതീക്ഷിച്ച് അന്‍‌വറോ, അന്‍‌വര്‍ മനസിലിട്ടുകൊണ്ട് ബാച്ച്‌ലര്‍ പാര്‍ട്ടിയോ, ബാച്ച്‌ലര്‍ പാര്‍ട്ടിയാണെന്നുകരുതി ഇയ്യോബിന്‍റെ പുസ്തകമോ കാണാനാവില്ല. അതെല്ലാം വ്യത്യസ്തമായ തുരുത്തുകളായിരുന്നു. കോമ്രേഡ് ഇന്‍ അമേരിക്ക(സി ഐ എ) എന്ന അമല്‍ ചിത്രവും അദ്ദേഹത്തിന്‍റെ മുന്‍ ചിത്രങ്ങളില്‍ നിന്ന് തികച്ചും വ്യത്യസ്തം.
അജി മാത്യൂസ് എന്ന കമ്യൂണിസ്റ്റുകാരന്‍ നായകനാണ് ദുല്‍ക്കര്‍ ഈ സിനിമയില്‍. അജി മാത്യുവിന്‍റെ പിതാവ് മാത്യൂസ്(സിദ്ദിക്ക്) ആകട്ടെ കേരള കോണ്‍ഗ്രസ് നേതാവും. രാഷ്ട്രീയവും തമാശയും നിറഞ്ഞ ആദ്യപകുതിയില്‍ നിന്ന് പ്രണയം തേടിയുള്ള രണ്ടാം പകുതിയിലേക്കുള്ള സ്വാഭാവികവും എന്നാല്‍ സംഘര്‍ഷാത്മകവുമായ പരിണാമമാണ് സി ഐ എ.
ഗോപി സുന്ദറാണ് സംഗീതവിഭാഗം കൈകാര്യം ചെയ്തിരിക്കുന്നത്. മികച്ച റിസള്‍ട്ടാണ് ഗോപി നല്‍കിയിരിക്കുന്നത്. സിദ്ദിക്ക്, ദിലീഷ് പോത്തന്‍, സൌബിന്‍ എന്നിവരും ദുല്‍ക്കറിനൊപ്പം തകര്‍പ്പന്‍ പ്രകടനം കാഴ്ചവച്ചു.
